Timor-Leste no Portugal haforsa kooperasaun bilaterál
Ministru Estadu no Negósiu Estranjéiru no Kooperasaun, José Luís Guterres, hasoru malu ho Ministru Negósiu Estranjéiru no Kooperasaun Portugál, Paulo Portas, iha loron 16 fulan Maiu, iha Lisboa, Portugál.
José Luís Guterres, hateten: “Objetivu hosi sorumutu ne’e atu hametin liután kooperasaun bilaterál entre nasaun rua, iha área oioin, liulu kooperasaun iha área edukasaun, ne’ebé haree kona-ba prezensa profesór Portugés sira iha Timor-Leste. Aleinde ne’e husi parte Portugál nian iha mós interese tebtebes atu hatene relasaun Timor-Leste nian ho país viziñu hanesan Indonézia no Austrália”.
Ministru José Luís Guterres mós informa tan, “Portugál iha kompromisu boot atu hakle’an liután kooperasaun ho Timor-Leste no reafirma solidariedade no fraternidade ho Povu no Estadu Timor-Leste nian”.
Iha biban ne’e mós Ministru na’in rua ko’alia kona-ba futuru instalasaun Embaixada Portugál nian iha Timor-Leste.
