Governu Timor-Leste

Prezidente Repúblika Taur Matan Ruak, prezide serimónia Isár Bandeira hodi komemora aniversáriu Restaurasaun Independénsia Timor-Leste nian ba dala sanulu-resin-ida, iha Palásiu Prezidénte Nicolau Lobato, Aitarak-Laran-Dili.

Prezidente Repúblika Taur Matan Ruak, iha ninia diskursu hateten, “Selebrasaun tinan ida ne’e nian iha momentu ne’ebé Nasaun tama ona iha otas foun ba dezenvolvimentu sosiál no ekonómika nian”. Ita tenki serbisu hamutuk hodi harii nasaun konforme ita-nia mehi, ne’e mak omenajen di’ak liu hotu ne’ebé ita bele fó ba Eroi Libertasaun Nasionál sira. Nasionalizmu no liberdade hori uluk kedas sempre sai nu’udar instrumentu atu dezenvolve sosiedade, halakon ki’ak, hadi’a kondisaun moris no kria nasaun ne’ebé la’o iha dame nia laran, seguru no riku liután. Ida ne’e maka knaar ne’ebé agora iha ita-nia oin, ita tenki hatutan ba jovem sira ezemplu sakrifísiu, serbí nasaun, laran metin nafatin iha luta ba soberania nasionál no lisaun seluseluk ne’ebé istória hanorin ba ita durante dékada hirak ne’e. Ita mós presiza aparellu Estadu nian ne’ebé efisiente duni atu bele hala’o ba oin prioridade nasionál dezenvolvimentu nian, no hadi’a lalais kualidade administarsaun públika nian,” hateten Matan Ruak.

Xefe Estadu mós subliña liután katak, Ita-nia nasaun la’o dadaun iha  momentu espesiál, istóriku ne’ebé fó oportunidade ba ita atu ajuda dezeña ita-nia futuru no moderniza ita-nia sosiedade, reforsa ita-nia identidade no apoveita valór sira ne’ebé di’ak hosi ita-nia tradisaun, timoroan hotu tenki partisipa atu halo ita-nia sosiedade no ita-nia nasaun sai di’ak liután.

Iha serimónia Isár Bandeira ne’e partisipa hosi Prezidente Tribunál Rekursu, Claúdio Ximenes, Prezidente Parlamentu Nasionál, Vicente Guterres, Prezidente Asembleia hosi São Tomé e Prínsipe, Alcino de Barros Pinto, membru Governu sira, deputadu sira, korpu diplomátiku sira, estudante sira no mós hetan partisipasaun másima hosi populasaun sira.

Iha selebrasaun tinan ida ne’e, halao mós atividade komemorativa oioin iha kapitál Díli, hanesan, Duasaun-ran, Certame, Kompetisaun Diskursu Favoritu 2013, konsertu múzika, jalan santai, Torneu Ordem Unidas (gerak jalan) no Karavana Artistíka.