Divulgasaun Matéria Polítika Desentralizasaun no Poder Lokál iha distritu Baucau
Primeiru-Ministru, Kay Rala Xanana Gusmão, iha loron 18, fulan Maiu, hasoru malu ho populasaun distritu Baucau nian hodi fó hatene kona-ba Projetu Implementasaun Polítika Desentralizasaun no Podér Lokál. Divulgasaun ba projetu ne’e hala’o durante loron rua, hahú hosi 18 to’o loron 19, fulan Maiu, tinan 2013, iha Kampu Futeból Baucau.
“Konseitu Munisípiu la’ós atu halo administrasaun distritu sai boot no desentralizasaun la’ós atu loke instituisaun barakbarak hodi haluantán iha distritu, maibé, desentralizasaun katak hakbesik Governu Sentrál ba Povu ho objetivu atu hasai povu hosi ki’ak no saida de’it mak ita nia povu presiza. Tanba ne’e, ita presiza hakbiit liután rekursu umanu sira, iha área administrasaun no jestaun, nune’e ita bele hadi’a povu nia móris, planeamentu, orsamentu no monitorizasaun’’, tenik Primeiru-Ministru.
Xefe Ezekutivu ne’e, husu ba komunidade Baucau oan tomak, hosi intelektuál, veteranu sira, partidu polítiku sira, ONG atu labele hanoin fahe malu de’it, maibé nia husu atu hamutuk hodi fó liman ba malu nune’e prepara-an didi’ak hodi bele simu munisípiu iha futuru, “tanba tempu to’o ona atu ita hamutuk hodi dezenvolve ita nia rai”.
Administradór distritu Baucau, António Guterres, haktuir katak, “Baucau la dúvida atu simu munisípiu, tanba iha ona rekursu umanu, rekursu natural nian sira ne’ebé sufisiente no preparadu ona iha área espesializada oioin, tanba rekursu umanus sai hanesan fatór determinante no modalidade ba Baucau atu implementa Kámara Munisípiu iha faze dahuluk ne’e”.
Distritu Baucau ho ninia luan 1.494 km², subdistritu 6 (Baguia, Baucau, Laga, Quelicai, Vemasse e Venilale), suku hamutuk 59 no totál abitantes, 113.700. Atividade prinsipál sira iha área dezenvolvimentu ekonomia nian mak hanesan, agrikultura subsisténsia iha propriedade sira familia nian, haki’ak animál sira, arroz, no turizmu, plantasaun foun sira (Kakau, nú no seluktán) no pezka.
Iha divulgasaun Projetu Implementasaun Desentralizasaun no poder lokál ne’e, diriji hosi Primeiru-Ministru rasik no akompañia hosi, Sekretáriu Estadu Desentralizasaun Administrativa, Tomás Cabral, Sekretáriu Estadu Dezenvolvimentu Lokál, Samuel Mendonça, Sekretáriu Estadu Fortalesimentu Institusionál, Francisco Soares, Sekretáriu Estadu ba Apoiu no Promosaun Setór Privadu, Veneranda Lemos, Prezidente Parlamentu Nasionál, Vicente Guterres, no hetan partisipasaun másimu hosi komunidade hosi sub-distritu neen distritu Baucau nian.
