Governu Timor-Leste

Primeiru-Ministru, Kay Rala Xanana Gusmão, fó sai ba populasaun kona-ba projetu atu implementa Projetu Desentralizasaun Administrativa no Podér Lokál ba da-sanuluk iha distritu Lautém. Divulgasaun ba projeitu ne’e hala’o durante loron rua, 16-17 fulan Maiu 2013 ho Tema “Unidade mak hamutuk Lautém oan sira atu hodi estabelese Municípiu’’.

Xanana Gusmão, hateten “Programa V Governu Konstitusionál nian buka atu estabelese sistema demokrátiku foun ida ba poder lokál nian. Ita hakarak fó ba ita nia povu atu desidi rasik buat sira ne’ebé mak afeta ba sira nia moris no sira nia subsisténsia. Ita hakarak mós fo ba ita nia povu atu buka rasik solusaun ba problema lokál sira. Hakarak mós enkoraja distritu idaidak atu jere no hala’o servisu públiku sira ne’ebé vitál ho forma ne’ebé adekuada hodi fó resposta ba sirkunstánsia, nesesidade no prioridade sira distritu nian”.

“Ha’u esplika dala barak ona iha distritu sira seluk, katak, Polítika Desentralizasaun Administrativa no Poder Lokál, tulun tebes dezenvolvimentu setór privadu nian iha área rurál, promove mós instituisaun sira iha Estadu ida forte, lijítimu no estavél; loke oportunidade ba partisipasaun demokrátiku hosi sidadaun sira no harii prestasaun servisu públiku ida ne’ebé efetivu, efisiente no ekuitativu hodi nune’e bele apoia dezenvovimentu sósiu-ekonómiku Nasaun nian”.

Xefe Governu ne’e husu ba grupu feto, veteranu, setór privadu, partidu politiku tomak, ONG, no intelektuál distritu lautem nian, atu tuur hamutuk hanoin ida de’it hodi haree ba interese povu distritu Lautem hodi hasai povu hosi ki’ak no mukit.

“Atu harii munisípiu tenke kria kondisaun, tenke prepara-an halo didi’ak, tanba ne’e ha’u mai atu doko imi nia hanoin. Ekipa ida mak sei tuun mai hodi haree ba potensialidade saida de’it mak iha distritu ne’e rasik hodi implementa munisípiu”, tenik Primeiru-Ministru.

Distritu Lautem ho ninia luan 1.702 km², totál abitante sira 65.300. Atividade prinsipál sira iha área dezenvolvimentu ekonomia nian mak hanesan, agrikultura subsisténsia, iha propriedade sira familia nian, haki’ak animál sira, arroz, no turizmu, plantasaun foun sira (kakau no seluk tan) no pezka.