Governu Timor-Leste

Primeiru-Ministru, Kay Rala Xanana Gusmão, iha Loron 14-15 fulan Maiu tinan 2013 hala’o vizíta dasiak ba Distritu Vikeke, hodi fó hatene ba populasaun sira kona-ba projetu implementasaun Polítika Desentralizasaun no Podér Lokál, iha distritu ne’ebá.

Iha diskursu Primeiru-Ministru hateten, “Bainhira atu estabelese Munisípiu, Vikeke-oan sira presiza kompriende didi’ak objetivu hosi Munísipiu ne’e rasik, signifika katak, estabelese ona Munisípiu, Vikeke-oan sira mak sei halo jestaun rasik ba rekursu no poténsia sira ne’ebé iha, hodi dezenvolve rasik Distritu no povu nia móris ho sustentabilidade. Ita hasoru malu ohin, atu enkoraja malu, liuliu Vikeke-oan sira, grupu intelektuál, seitór privadu, veteranu, grupu feto, ONGs no foin sa’e sira atu servisu hamutuk ho Administradór Distritu, Komisaun Instaladora no Líder Komunitáriu sira, atu hahú ona identifika poténsia no difikuldade sira ne’ebé iha, atu diskute no halo planu hodi prepara atu simu Munisípiu ho kompeténsia no responsabilidade”.

"Atu estabelese Munisípiu iha Distritu Vikeke, presiza kontribuisaun hosi entidade tomak no presiza tau hamutuk hanoin oinsá halo implementasaun desentralizasaun no podér lokál, hodi bele garante ba futuru ida di'ak ba labarik sira. Tanba ne'e mak implementasaun Munisípiu ne’e importante tebes, atu nune'e ita bele ko'alia ba malu iha ita boot sira nia distritu rasik”, tenik Xanana Gusmão.

Distritu Vikeke ninia luan, 1.781 km², populasaun hamutuk, 72.900, iha suku 35 no subdistritu 5 (Lacluta, Ossú, Uatolari, Uatucarbau no Viqueque). Atividade prinsipál sira iha área ekonomia no potensiál dezenvolvimentu nian mak, agrikultura subsisténsia iha propriedade sira familia nian, haki’ak animál no iha mós rekursu Petróleu no gás, turizmu, ortikultura no pezka nian.