Ministru Obras Públikas observa estrada subdistritu Ossu ba distritu Vikeke
Ministru Obras Públikas, Gastão de Sousa, iha loron 14 fulan Maiu ne’e hala’o vizita ba distritu Vikeke hodi halo observasaun ba kondisaun Estrada hosi subdistritu Ossu ba distritu Vikeke.
Iha biban ne’e, Ministru Obras Públikas, Gastão de Sousa informa katak, Kompañia MODENA ho OHK mak hetan fiar no sei kaer projetu ba hadi’a estrada subdistritu Ossú ba distritu Vikeke ne’ebé sei hala’o iha tinan ne’e nia laran ho orsamentu mai husi Orsamentu Jerál Estadu 2013.
“Ami iha pakote orsamentu ba hadi’a estrada kada tinan. Iha tinan ne’e sei tau ba hadi’a estrada ne’ebé liga Ossú mai Vikeke, hafoin tinan oin sei haree fali iha fatin seluk,” hato’o Ministru Gastão de Sousa.
Ministru haktuir tan katak, kontratu ne’e hein finaliza de’it ona tanba projetu ne’e kontinuasaun iha tinan rua liu ba nian, “tanba bainhira ita hakarak atividade ekonómia la’o ho di’ak tenke hadi’a estrada halo didi’ak. Aleinde ne’e, projetu ne’e multi anuál ne’ebé dadauk ne’e iha orsamentu dolár milaun ida resin”.
