Governu Timor-Leste

Ministériu Justisa, liuhosi Sekretáriu Estadu Terras no Propriedade iha loron, 6 fulan Maiu, tinan 2013, komesa sosializa pakote Lei Terra no Propriedade ba povu sub-distritu Hatulia zona A, distritu Ermera, hodi prepara esbosu ne’e atu sai lei ba nasaun Timor-Leste. Durante semana ida Sekretáriu Estadu vizita iha sub-distritu ne’e. Iha loron 6, hahú iha suku Asulau-Sare. Pakote iha lei tolo: Lei Expropriasaun, Fundu Finanseiru Imobiliáriu no Rejime Espesiál ba Definisaun Titularidade Bens Imóveis nian.

Sekretáriu Estadu Terra no Propriedade, Jaime Xavier Lopes iha aprezentasaun kona-ba esbosu Lei rai nian hateten,” rai nu’udar fatór prinsipál ba ema nia móris hahú kedas hosi beiala sira mai to’o ita. Tuir Konstituisaun RDTL, artigu 54 hateten, ‘sidadaun hotu-hotu iha direitu ba rai”,  tan ne’e ohin iha vizita ne’e, hakarak atu esplika ba povu sira iha suku Asulau-Saré atu hatene sira nia direitu kona-ba rai hodi labele okupa arbiru de’it ema seluk nia rai, nune’e sira bele hatene ona ukun rasik an ne’e atu ukun sasán ne’ebé sira nian rasik no labele ukun ema seluk nian”. Aleinde ne’e mós Sekretáriu Estadu esplika ba sira kona-ba rai ne’ebé abandonadu povu la iha direitu atu okupa, bainhira hakarak okupa tenke halo kontratu arendamentu ho Governu.

Iha biban ida ne’e mós Jaime Xavier Lopes, sublina liu kona-ba rezolve problema ka disputa rai labele uza violénsia ka halo krime, bainhira halo krime hodi halakon ema nia vida tanba rai pedasuk ida, sei la fó solusaun. “Governu identifika ona katak, problema disputa rai iha nasaun ida ne’e distritu Ermera okupa númeru 2, hosi distritu Díli, tan ne’e husu ba populasaun sira hotu katak, karik iha problema kona-ba rai ita bo’ot sira tenke rezolve tuir tradisaun idaidak nian no tuir kostume feto san-umane no envolve katuas lia na’in sira, líder komunitáriu, testemunã, binhira la hetan solusaun maka rezolve iha nivél sub-distritu”.

Iha okaziaun lansamentu ne’e, Komandante Polísia Eskuadra sub-distriu Hatulia hateten katak, “prosedimentu atu rezolve problema rai, maka liuhusi Líder Komunitáriu, Xefe Aldeia, Lia Na’in no rai na’in sira, maibé la’ós servisu polísia nian. Bainhira tama ona ba iha ameasa malu ne’e krime no bainhira halo krime sei hasoru malu ho Lei”.

Suku Asulau-Saré ho luan 40.000 m², iha aldeia neen ho totál xefe família 426. Suku Asulau-Saré, sub-distritu Hatulia nia baliza parte oeste ho sub-ditstritu Kailaku, distritu Bobonaru, sul ho sub-ditritu Atabae, leste baliza ho sub-distritu Maubara no norte sorin balu baliza ho sub-distritu Ermera.

Atividade populasaun ninian ba loron-loron maka hala’o agrikultura iha natar no kafé, teka, hakiak animál hanesan karau, kuda, bibi no fahi. Problema ne’ebé suku ne’e enfrenta maka la hetan asesu ba estrada, bee moos, saneamentu no iha mota rua haleu suku Asulau-Saré, ne’ebé tinan-tinan sempre sobu natar.

Marka prezensa iha lansamentu konsulta Projecto Lei Terra no Propriedade ba populasaun suku Asulau- Saré, Sekretáriu Estadu Terra no Propriedade, Jaime Xavier Lopes, Diretór Nasionál Terra no Propriedade distritu Ermera, Komandante Eskuadra sub-distritu Hatulia, líder komunitáriu no povu suku Asulau-Saré.