Governu Timor-Leste

Sekretáriu Estadu Terra no Propriedade, Jaime Xavier Lopes, informa ba povu suku neen iha subdistritu Hatulia zona A no B ne’ebé tama iha kategoria hanesan suku sira ne’ebé iha konflitu; Asulau-Sare, Lisapat, Fatubolu, Ura-Hou, Mau-Ubu no suku Fatu-Bessí, katak, iha ita nia Konstituisaun RDTL, artigu 54, hateten, povu Timor-Leste iha direitu ba rai.

Jaime Xavier Lopes ninia vizita hodi halo sosializasaun pakote Lei Terra no Propriedade ba povu sub-distritu Hatulia, distritu Ermera, hodi prepara esbosu ne’e atu sai lei ida ba nasaun Timor-Leste. vizita ne’e durante semana ida, hahú iha loron 6, fulan Maiu to’ iha loron 11 fulan  Maiu.

“Governu mós prepara ona esbosu Lei tolu atu submete ba iha Konsellu Ministrus bele haree hodi fó pareser, nune’e bele aprova hodi haruka ba Parlamentu Nasionál atu debate no ikus liu haruka ba Sua Exelénsia Prezidente Repúblika atu promulga, esbosu Lei sira ne’e mak hanesan, Lei Expropriasaun, Fundu Finanseiru Imobiliáriu no Rejime Espesiál ba Definisaun Titularidade Bens Imóveis nian. Iha artigu ida hateten katak, “ema ne’ebé hela molok 1999 (ka to’o loron 31 fulan Dezembru tinan 1998) iha direitu ba uza rai”, esplika Jaime Xavier Lopes.

Objetivu husi vizita Sekretáriu Estadu nian ne’e, atu informa ba populasaun sira katak, plantasaun ne’ebé Governu Portugés husik hela no kontinua uza hosi Governu Indonézia, inklui rai ne’ebé abandona ne’e pertense ba Governu Timor-Leste no mós Propriedade hosi Governu Portugés mai to’o iha Governu Indonézia hela ba Estadu Timor-Leste. Vizita Sekretáriu Estadu nian ne’e atu haree mós inisiativa husi suku lima iha sub-distritu Hatulia zona B no mós Asulau-Sare no Talo iha zona A halo rejistu ba plantasaun sira Estadu nian.

Aleinde ne’e mós, husu ba Governu atu investe hodi buka kompañia ida ne’ebé iha kualidade atu tau atensaun ba iha plantasaun Estadu nian no mós bele fó servisu ba populasaun iha suku sira hodi dezenvolve ekonomia povu sira nian.

Marka prezensa iha konsultasaun pakote Lei Terra no Propriedade ba populasaun suku Asulau, Sare, Lisapat, Fatubolu, Ura-Hou, Mau-Ubu no suku Fatu-Bessí mak hanesan, Sekretáriu Estadu Terras no Propriedade, Jaime Xavier Lopes, Diretór Nasionál Terras no Propriedade distritu Ermera, Xefi Gabineti, Administradór sub-distritu Hatulia, Komandante Polísia distritu Ermera, Komandante Polísia komunitáriu postu Rai-Leten, líder komunitáriu sira, Konsellu suku no povu suku neen.