Governu Timor-Leste

Governu Timor-Leste liuhosi Vise-Ministru Transporte no Komunikasaun, Flávio Cardoso Neves, halo lansamentu ba primeiru voo aviaun Sriwijaya Air nian ho diresaun operasaun Díli-Bali-Jakarta ba mai, iha loron 10 fulan Maiu, iha Aeroportu Internasionál Prezidénte Nicolau Lobato.

Vise-Ministru Transporte no Komunikasaun, Flávio Cardoso Neves, hateten, “bainhira ha’u atu mai iha ne’e ema hotu seidauk hatene aviaun Sriwijaya, maibé ohin loron ita haree, aviaun Merpati iha sorin no Sriwijaya iha sorin. Ho kooperasaun Governu Timor-Leste no Governu Indonézia ne’ebé di’ak mak ohin loron Aviaun Sriwijaya Air, bele semo mai iha ne’e”.

Iha fatin hanesan Komisáriu Kompañia Aviaun Sriwijaya Air, Sunario Supratomo liuhosi nia diskursu hateten, “ami iha esperansa uluk kedas hakarak servisu hamutuk no halo relasaun di’ak ho nasaun viziñu Timor-Leste”.

“Tanba ne’e ami hein ho pasiénsia, iha semana rua liu ba ami rona katak Governu Timor-Leste fó ona lisensa mai ami Sriwijaya Air atu bele halo operasaun mai Díli. Hetan tiha oportunidade ne’e, ami sente kontenti tebes no ami mai hasouru kedas Primeiru-Ministru, Kay Rala Xanana Gusmão no Membru Governu hanesan Ministru Negósiu Estranjeiru no Kooperasaun, Ministru Transporte no Komunikasaun no Embaixadór Timor-Leste ba Indonézia, atu nune’e, bele realiza kedas kooperasaun ida ne’e. Ohin it abele halo ona lansamentu ba semo dahuluk Aviaun Sriwijaya Air nian”.

Marka prezensa iha serimónia lansamentu ne’e, Primeira Dama Prezidénti RDTL, Isabel Ferreira, Ministru Komérsiu Indústria no Ambiente, António da Conceição, Vise-Ministru Transporte no Telekomunikasaun, Flávio Cardoso Neves, Sekretáriu Estadu Assuntu ASEAN, Roberto Soares, Embaixadór Indonésia ba Timor-Leste, Primanto Hendra Susmoro, Korpu Diplomátiku balun, Diretór no Pilotu Aviaun Sriwijaya Air tomak.