Governu partisipa iha serimónia emposamentu ba estrutura Timor-Leste Press Club
Sekretáriu Estadu Komunikasaun Sosiál (SEKomS) iha loron 2 fulan Maiu iha subdistritu Balibó, distritu Bobonaro partisipa iha serimónia fó posse ba estrutura Timor-Leste Press Club (TLPC) 2013-2016 ho ninia tema “Pozisaun Jornalista ba Konstrusaun Timor-Leste” no komemorasaun loron mundiál liberdade imprensa nian ne’ebé monu iha loron 3 fulan Maiu.
Nélio Isaac Sarmento, hateten, organizasaun Press Club harii atuhodi, halibur no valoriza liután jornalista Timor-Leste nian. Sekretáriu informa mós, “iha loron 3 fulan Maiu tinan 2013 ita sei selebra loron importante ba jornalista sira ne’ebé ita bolu naran loron mundiál liberdade imprensa. Bainhira ita komemora loron mundiál ne’e ka loron mundiál seluk, iha buat rua presiza atu relembra buat ne’ebé akontese iha tinan liubá, no ita atu tau iha prátika iha servisu lor-loron nian”.
Sekretáriu Estadu husu ba Press Club atu tau atensaun liu ba programasaun liuliu programa atu kapasita jornalista sira, ne’e mak importante, nune’e mós oinsá atu defende profisaun jornalista sira no ikus liu mak, kuandu órgaun komunikasaun sosiál ka media sira iha kualidade, ita nia Nasaun sei sai forte.
Prezidente Press Club, José Belo, haktuir, “hanesan lideransa Press Club nian 2013-2016 ami halo esforsu hotu-hotu koko atu bele responde preokupasaun husi públiku liuliu ba jornalista sira-nia servisu no mós sira nia direitu. Ho laran kontente ami sente katak Governu ka Estadu hatudu ka hatuur duni liberdade imprensa iha nasaun ida ne’e”.
Administradór subdistritu Balibó, Paulo dos Santos, hatete, “hanesan buat foun ida ba iha subdistritu Balibó ne’ebé durante ne’e hamrook ba informasaun importante no agradese tebes tanba eventu ida ne’e hala’o iha rai ida ne’e atu hanoin filafali ita nia maluk jornalista sira husi Austrália ne’ebe maka mate iha rai ida ne’e. Tan ne’e, komunidade Balibó eziji karik ba oin, ne’e komunidade hanoin oinsá harii mós monumentu ida ba ita nia maluk jornalista na’in lima Austrália nian, nune’e bele iha istória ba jerasaun atu konta ba nafatin.
Marka prezensa iha serimónia ne’e Sekretáriu Estadu Komunikasaun Sosiál, Nelio Isaac Sarmento, Sekretáriu Estadu ba Polítika kona-ba Formasaun Profisionál no Empregu, Ilídio Ximenes da Costa, Sekretáriu Estadu Seguransa, Francisco da Costa Guterres, Administradór subdistritu Balibó, Paulo dos Santos, no Padre Parókia, Andreas Nahak.
