RTTL, E.P. no LPP RRI asina MoU atu halo transmisaun hamutuk
Rádio Televizaun Timor-Leste, Empreza Públika (RTTL, E.P.), no Lembaga Penyiaran Publik Radiu Republik Indonesia (LPP RRI), iha Tersa-feira, loron 7 fulan Maiu 2013, iha Otel Timor, Díli, asina nota entendimentu ida kona-ba hala’o transmisaun hamutuk ba informasaun entre rai rua ne’e nian.
Iha diskursu Prezidente Konsellu Administrasaun RTTL, E.P., Expedito Dias Ximenes, hatete, “asina akordu entre media rua ne’e importante tebes atu halo transmisaun hamutuk kona-ba notísia, kultura, divertimentu, turizmu, desportu, ekonomia, no seluk tan. “Asina akordu ne’e mós pozitivu tebes ba ita nia populasaun sira ne’ebé hela iha área fronteira hanesan Atambua no Kupang, sira sei simu nafatin informasaun husi ita nia RTTL, E.P.. Ita iha Timor-Leste mós sei hetan informasaun hosi ita-nia maluk sira ne’ebé iha Atambua no Kupang liuhosi kanál RRI nian.
Diretora Lembaga Penyiaran Publik Radio Republik Indonesia (LPP RRI), Rosalita Niken Widiastuti, hatete, “Radio Televizaun Timor-Leste, RTTL, E.P. no Radio Repúblik Indonesia, RRI iha misaun hanesan oinsa atu hato’o informasaun ne’ebé loos no kredível ba populasaun. Liuhosi asina akordu ne’e mós Radio Repúblika Indonesia sei fó kapasitasaun ba pesoál sira hosi RTTL, E.P.iha área oin-oin, nune’e mós ho prezensa Radio Repúblik Indonesia iha Timor-Leste, ne’e bele haburas liután relasaun entre Timor-Leste no Indonezia”.
Iha fatin hanesan, Sekretáriu Estadu Komunikasaun Sosiál, Nélio Isaac Sarmento, hateten, “Media iha nasaun dezenvolvidu, nu’udar instrumentu ida atu reforsa polítika ekonomia nasaun nian. Iha asina akordu ida ne’e ita fó atensaun liu kona-ba oinsá atu fó informasaun sira ba ita ninia populasaun ne’ebé hela iha área fronteira Atambua no mós iha Kupang; tan ne’e mak asina nota entendimentu ida ne’e atu informasaun bele ba to’o iha área hirak ne’ebá”.
Nune’e mós Embaixadór Interinu Indonézia nian iha Timor-Leste, Mahendra, esplika katak, fundamentu hosi asina nota entendimentu entre RTTL, E.P. no LPP RRI ne’e hatudu duni kompromisu hosi Governu Indonesia nian atu servisu hamutuk ho Timor-Leste iha setór oioin.
Serimónia ne’e hetan partisipasaun hosi Sekretáriu Estadu Komunikasaun Sosiál, Nélio Isaac Sarmento, Embaixadór Interinu Indonézia nian iha Timor-Leste, Mahendra, Prezidenti Konsellu Administrasaun RTTL, E.P., Expedito Dias Ximenes inklui staff RTTL, Diretora Lembaga Penyiaran Radio Republik Indonesia (LPP RRI), Rosalita Niken Widiastuti, no mós xefi RRI rejionál Kupang no Atambua nian.
