Projetu Desentralizasaun Administrativa no Poder Lokál hala’o divulgasaun iha distritu Ermera
Primeiru-Ministru, Kay Rala Xanana Gusmão, kontinua hala’o divulgasaun ba Matéria Polítika Desentralizasaun Administrativa no Poder Lokál ba dawaluk iha distritu Ermera, iha Sesta-feira, loron 3, fulan Maiu tinan 2013.
“Poténsia rekursu naturál no rekursu umanu nian sira ho atividade ekonómika sira ne’ebé eziste iha distritu Ermera hanesan esperansa ida atu hadi’a povu iha distritu ida ne’e nia moris ba iha futuru. Atu hametin liután ami povu Ermera nia esperansa hirak ne’e, ohin ami hakarak rona liafuan murak husi Primeiru-Ministru, kona-ba konseitu munisipalidade ho nune’e bele hariku tan ami nia hanoin atu bele alkansa ami nia mehi”, hateten Administradór distritu Ermera, Vitor dos Santos.
Primeiru-Ministru, Kay Rala Xanana Gusmão, hateten: “Ohin ita mai hamutuk iha fatin ida ne’e atu ko’alia kona-ba futuru ne’ebé ita sei harii, futuru ne’ebé ita temi desentralizasaun, ko’alia kona-ba munisípiu sira, katak munisípiu ne’e saida. Ema balun hanoin dehan katak, hakbesik Governu, Estadu ba Povu, balun dehan redúz burokrasia atu buat hotu-hotu ne’ebé distritu no subdistritu ida presiza, bele hala’o lailais ne’e mós loos la sala, maibé ba Timor-Leste, ita buka modelu ida ne’ebé mak di’ak atu implementa. Hau mai iha ne’e atu husu imi nia hakarak, maibé buka modelu ida ne’ebé mak kondiz ho nivél sósiu, ekonómiku no kulturál, povu Timor-Leste nian, ne’ebé ita rasik mak sei desidi.
Tanba ne’e, ha’u husu ba Povu liu-liu matenek na’in Ermera-oan sira atu hasa’e ekonomia sustentavél no liberta povu hosi mukit. Povu harii Estadu ho sakrifisiu ne’ebé boot, lakon buat tomak atu halo no atu hetan moris di’ak iha futuru. Dala ida tan husu ba Ermera-oan sira sira atu fó tempu hodi mai hamutuk iha Ermera atu hodi hanoin hamutuk oinsá bele liberta povu hosi mukit no terus, liuhosi segunda Independénsia ne’e”.
Distritu Ermera iha subdistritu 5 (Atsabe, Ermera, Hatolia, Letefoho no Railaku) no suku hamutuk 52, ho ninia luan, 746 km2, totál populasaun hamutuk ema: 118.700. Atividade prinsipál sira iha área dezenvolvimentu ekonomia nian mak hanesan, kafé, agrikultura subsisténsia iha propriedade sira familia nian, haki’ak animál sira, arroz, turizmu, hahan espesiál ida sira no pezka (be’e midar nian).
