Governu Timor-Leste

Primeiru-Ministru, Kay Rala Xanana Gusmão, kontinua hala’o divulgasaun ba Matéria Polítika Desentralizasaun no Poder Lokál ba dahituk iha distritu Likisa, iha kinta-feira, loron 2 fulan Maiu tinan 2013.

Iha Divulgasaun ne’e, Administradór distritu Likisa, Domingos dos Santos, hateten, “Ami hatoo obrigadu tanba Primeiru-Ministru bele hakat mai to iha Distritu Likisa hodi haree ami nia situasaun real kona-ba hanoin no avalia mos Likisa oan sira nia kompromisu ba prepararasaun hodi hasoru laloran boot ne’ebé atu mai mak Planu Desentralizasaun Poder Lokál (PEDD) no implementasaun munisipalidade. Katak sadik ami Likisa oan tomak halo preparasaun atu halibur hanoin oinsá Likisa oan bele deklara segunda independensia ne’ebé hanaran aan Camara Munísipiu. Atu transforma mehi ne’e sei bazeia ba indikadór importante balun ne’ebé merese priense sai rekezitus hanesan rekursu humanu”.

Administradór mós hatutan, atu sukat ami nia preparasaun sente katak, Likisa oan prontu, faktus mak sua exelensia haree rasik, povu, joventude, veteranus, matenek oan sira, emprezarius ho antusiais akompaña ho espíritu  unidade nuudar Likisa oan mai atu rona  no hatudu sira nia prontidaun bainhira knaar tula ba ba sira nia leten ho boavontade atu hatur hela hanoin ruma katak oinsa Governu sentrál aborda ho didiak prosesu transformasaun  poder  mai distritu.

Primeiru-Ministru, Kay Rala Xanana Gusmão, iha ninia intervensaun hateten, “Munisipalidade signifika katak, atu lori Governu hodi mai besik liu povu ka fó kompetensias mai besik povu atu redus Burokratizasaun. Tanba ne’e mak implementa munisipiu iha Timor-Leste, sai nuudar segundu independensia ba rai ida ne’e”.

Xefe Governu ne’e esplika tan, “Ohin ita mai atu buka kompriende, buka hetan saida mak di’ak ba ita kona-ba munisipiu ne’e. Bainhira ita kompara munisipalidade Portugal ho Indenézia nian, ita seiduak to’o iha ne’eba tanba ita foin mak hahú ho prosesu ida ne’e, ita sei hasoru problema oioin iha ita nia sosiedade iha nivel kulturál,ekonómiku ho sosiál, tanba ida ne’e maka ita atu buka modelu ida ne’ebé mak ita bele aplika iha ita nia rain iha nivél sira ne’e”.

Primeiru-Ministru, Kay Rala Xanana Gusmão mós enkoraza tán intelektuál, profesionais no veteranu sira no lider komunitáriu atu tur hamutuk hodi haree didi’ak imi nia knaar iha munisípiu ne’e oinsá, no tenke prepara an didi’ak no mós identifika potensia no dezafiu sira ne’ebé iha atu dezenvolve Distritu Likisa., husu mos ba Likisa-oan sira atu prepara an didi’ak iha Komisaun Instaldora Munisipiu nian nuudar mákina operasaun ida ba implementa Munisipiu iha futuru”.

Distritu Likisa ninia luan iha 543 km²,  iha subdistritu tolu no suku hamutuk 23, totál populasaun hamutuk 69.900. atividade ekonómiku prinsipál sira iha Distritu ne’e mak, Turizmu, agrikultura no hortikultura, artezenatu tradisonál no pezka.