SEPFOPE selebra Loron ba Traballadór
Sekretaria Estadu Polítika Profisionál no Empregu (SEPFOPE) iha loron 30 Abril iha salaun SEPFOPE, Kaikoli, Dili, organiza semináriu loron ida hodi selebra loron mundiál ba traballadór nian iha loron 1 fulan Maiu, ho nia tema “Liuhosi Formasaun Profisionál Hamenus Dezempregu no Fortalese Armonia Iha Relasaun Industriál”.
Objetivu hosi semináriu ne’e hanesan reflesaun kada tinan ba Governu no entidade sira atu hamutuk iha mehi ida de’it liuhosi koordenasaun tripartida kona-ba oinsá atu hamenus dezempregu iha rai ida nee; intensifika produtividade no prosperiedade ba empregadór no empregadu liuhosi servisu ne’ebé di’ak; minimiza problema relasaun traballu, kria ambiente traballu ne’ebé estável, promove no fiskaliza seguransa no ijiene iha servisu fatin.
Sekretáriu Estadu Polítika Profisionál no Empregu, Ilído Ximenes da Costa hateten, “semináriu ida ne’e fanun ita atu haree ba tema ne’ebé ko’alia barak kona-ba traballu dignu. International Labour Organization (organizasaun internasionál ba traballu), nu’udar organizasaun ida ne’ebé proteja direitu no dignidade traballdór sira nian. Bainhira ita ko’alia kona-ba paradigma polítika, globalizasaun, maibé ita rasik seidauk hatene ita nia identidade rasik nu’udar traballadór, oinsá mak ita bele asegura traballadór sira nia direitu karik ita la hahú agora kedas?”.
“Dezenvolvimentu atu reduz númeru dezempregu la’ós de’it husi setór ida de’it, setór privadu mós hanesan ai-riin ida ne’ebé importante. Buat ida ne’ebé importante mós mak ideia, pensamentu no atualizasaun, asaun mak hatudu ema nia interese atu defende povu ki’ik nia halerik no tulun sira”, hateten Ilído Ximenes da Costa.
Prezidente Konfederasaun Sindikatu Traballadór Timor-Leste, (KSTTL), Agostinho Soares, hateten “KSTTL fó hanoin katak Governu no Parlamentu Nasionál tenke garante estabilidade ba investimentu estranjeiru hodi bele redúz númeru dezempregu ne’ebé kada tinan aumenta ba beibeik.
Reprezentante Kámara Komérsiu Industriál, João Baptista, haktuir, “hamenus dezempregu nia fatór ida maka hasa’e kapasidade téknika, skill traballdór sira-nian liuhusi formasaun profisionál maibé ne’e la’ós úniku, iha tan dalan seluk mak investimentu husi setór privadu tanba ita labele hein de’it hosi Governu, maibé atu investe nia tenke iha kapasidade no atu iha kapasidade presiza kria kondisaun”.
