Governu Timor-Leste

Iha aniversáriu Loron Mundiál Liberdade Imprensa nian ba da-20, ne’ebé monu iha loron 3 fulan Maiu tinan 2013, Governu Repúblika Demokrátika Timor-Leste asina kontratu ida ho órgaun komunikasaun sosiál nasionál sira ho objetivu atu promove asesu ba informasaun iha Timor-Leste, hodi apoia distribuisaun imprensa nasionál iha distritu, subdistritu no suku hotu-hotu iha nasaun laran.

Liuhusi kontratu ida, ne’ebé halo ho média nasionál sira (Timor Post, Jornal Independente, Suara Timor Lorosae, Grupo Media Nacional no Tempo Semanal), Sekretaria Estadu Komunikasaun Sosiál (SEKOMS) hakarak atu promove asesu ba informasaun no garante direitu universál iha asesu ba média iha Timor-Leste, liuliu ba populasaun sira ne’ebé izolada liu, no atubele garante katak sidadaun hotu-hotu bele akompaña atividade sira Estadu nian ho sentidu krítiku atu nune’e bele iha partisipasaun ne’ebé ativu liután iha demokrasia nasaun nian.

Liuhusi Protokolu kooperasaun nian ida ne’e, Governu Repúblika Demokrátika Timor-Leste hakarak tulun órgaun komunikasaun sosiál nasionál sira, ne’ebé seidauk iha meiu hirak ne’ebé própriu atu kobre territóriu nasionál tomak, hodi to’o ba populasaun sira ne’ebé hela dook liu no kontribui, iha tempu ne’ebé hanesan, ba fortalesimentu sira nia rekursu umanu no finanseiru atu nune’e iha futuru sira bele fahe rasik sira nia jornál sira iha nasaun laran tomak. Distribuisaun jornál nian, sei hahú iha fulan ida ne’e no sai hanesan parseiru estratéjiku mak lider komunitáriu sira ne’ebé bele akompaña dezenvolvimentu nasaun nian no atividade sira Governu nian liuhusi notísia hirak ne’ebé fó sai iha imprensa nasionál sira ho nune’e, bele fó informasaun ba populasaun hirak ne’ebé izolada liu. Governu konsidera katak inisiativa ida ne’e sei kontribui atu hatoman lee nian iha populasaun sira nia leet.

Inisiativa ne’e konta ho apoiu husi Ministériu Administrasaun Estatál ne’ebé sei apoia distribuisaun jornál sira iha distritu, subdistritu no suku sira loroloron no semana-semana.