Ministru Justisa halo abertura formasaun majistradu ba dalimak
Ministru Justisa, Dionísio Babo, halo abertura ba formasaun majistradu ba dalimak nian. Kandidatu timor-oan ne’ebé pasa ona iha selesaun faze dahuluk hamutuk ema na’in sanulu no faze daruak hamutuk ema na’in tolunulu, ho nune’e hamutuk ema na’in haatnulu mak tuir formasaun iha Sentru Formasaun Jurídiku Kaikoli, iha segunda-feira loron 22, fulan Abril , tinan 2013.
“Ha’u fó parabéns ba imi hotu tanba ho esforsu maka’as bele liu ona selesaun hodi tuir formasaun. Prosesu selesaun rigorozu tebtebes atu hetan kualifikasaun ne’ebé di’ak. Agora ekipa rekrutamentu konsege hetan duni kandidatu sira hodi prienxe vaga ne’ebé ita presiza. Matéria teste nian ba kandidatu sira mak hanesan Kódigu Prosesu Penál no Kódigu Prosesu Sivíl. Kandidatu sira tenke mantein nafatin disiplina bainhira tuir formasan tanba Estadu gasta osan bo’ot hodi selu formadór mai hosi Portugál, atu ajuda no dezenvolve liután ita nia kapasidade nune’e bele sai hanesan Defensór Públiku ne’ebé kualifikadu iha futuru”, hatete Ministru Justisa.
Iha okaziaun ne’e mós, Diretora Sentru Formasau Jurídiku, Marcelina Tilman, hateten katak, konkursu ba selesaun kandidatu formasaun Majistradu ba dalimak nian ne’e, hala’o iha etapa rua; kandidatu sira ne’ebé tuir teste hamutuk ema na’in 221 kompostu hosi mane 164 no feto 57.
Marka prezensa iha seremónia abertura ne’e, Ministru Justisa, Dionísio Babo, Prezidente konsellu Jestaun Disiplina no Advokasia, Nelinho Vital, Diretora Sentru Formasaun Jurídiku, Marcelina Tilman no kandidatura Majistradu sira hotu.
