Inaugurasaun projetu abastesimentu sistema bee moos iha distritu Ermera
Sekretáriu Estadu Agua Saneamentu no Urbanizasaun, Elias Pereira Moniz, servisu hamutuk ho Uniaun Europeia no UNICEF iha Timor-Leste, iha loron 25 fulan Abril 2015 inaugura Projetu Abastesimentu Sistema Bee Moos iha Aldeia Poeana, Suku Humboe, Subdistritu Ermera, Distritu Ermera.
Elias Pereira Moniz, fó parabens ba komunidade Poeana, ne’ebé fó sira nian-an tomak voluntariamente hodi realiza ho susesu kontrusaun projetu abastesimentu bee moos iha Aldeia Poeana. Bainhira laiha bee moos, laiha moris ,atu iha bee di’ak tenke iha saneamentu ne’ebé di’ak, saneamentu ladi’ak kualidade bee ladi’ak entaun moris mós ladi’ak. Programa implementasaun bee moos, saneamentu , ho atividade ijiene importante tebes ba ita-nia moris.
Reprezentante UNICEF iha Timor-Leste, Hogwei Gao, hatete katak sistema abastesimentu sistema bee moos ne’e realiza ona, maibé husu ba komunidade atu asegura nafatin instalasaun bee moos ne’e.
Iha fatin hanesan Embaixadora Uniaun Europeia iha Timor-Leste, Sylvie Tabesse, agradese ba komunidade aldeia Poeana tanba bele iha ona asesu ba bee moos, tanba ne’e Uniaun Europeia sei kontinua fó apoiu nafatin ba komunidade sira ne’ebé mak iha área urbana.
Xefe Suku Humboe, Pedro Exposto Salsinha sente orgullu ba ajudu ne’ebé mak Uniaun Europeia no UNICEF fó tanba liuhosi ajudu ne’e komunidade bele hetan asesu ona ba bee moos.
