Konstrusaun Sentrál Elétrika Betanu iha kualidade internasionál
Tersa-feira, loron 16 fulan Abríl, Primeiru-Ministru, Kay Rala Xanana Gusmão, akompaña hosi Sekretáriu Estadu Eletrisidade, Januário Pereira, hala’o observasaun ba iha sentrál elétrika Betanu, hodi haree diretamente konstrusaun ne’e, ne’ebé tuir planu sei fornese enerjia elétrika ba populasaun iha parte Kosta Súl.
“Projetu konstrusaun sentrál elétrika Betanu oras ne’e daudaun atinji ona pursentu atus ida, maske iha parte li’ur Switcer sei hein materiál ne’ebé iha ona portu Díli. Inaugurasaun ba Sentrál Elétrika ne’e sei hala’o iha inísiu fulan Jullu. Prosesu konstrusaun sentrál elétrika Betanu iha kualidade internasionál, tanba tékniku sira ne’e mesak profisionál sira ne’ebé mai hosi rai Finlándia no Índia. Governu sei halo esforsu atu sub-distritu sira hotu iha país nia laran bele hetan asesu ba eletrisidade iha futuru”, hateten Sekretariu Estadu Eletrisidade.
