SEPI kolabora ho Paz y Desarrollo hodi promove feto iha Timor-Leste
Iha loron 23, fulan Abril, tinan 2013, Sekretária Estadu ba Promosaun Igualdade, Idelta Maria Rodrigues, servisu hamutuk ho ajénsia Internasionál Paz Y Desarollo, hala’o programa hakbiit Feto Timor-Leste, iha área ekonomia no polítika. Serimónia ne’e hala’o iha edifisiu Sekretaria Estadu ba Promosaun Igualdade (SEPI), iha Palásiu Governu.
“Akordu ne’e sei sai padraun ba kooperasaun no fasilita kolaborasaun entre SEPI no Paz y Desarrollo hodi hakbiit kooperasaun liuhosi diálogu, troka esperiénsia, organiza no partisipa hamutuk iha atividade espesífíku sira iha nivél rejionál, nasionál, lokál no mós konsulta no troka materiál treinamentu hodi bele atinji igualdade jéneru no hakbiit feto”, haktuir Sekretária Estadu Promosaun Igualidade, Idelta Maria Rodrigues.
Parseria entre SEPI ho Paz y Desarrollo iha Timor-Leste, hahú tiha ona iha tinan 2010. Ohin halo fali estensaun akordu ba parseria ne’e ba tinan rua. Bazeia ba akordu ne’ebé asina tinan tolu liubá, Paz y Desarrollo halo ona atividade lubuk boot relasiona ho promosaun ba igualdade jéneru.
“Sira ko’alia liu ba implementasaun CEDAW iha nível lokál, hodi promove partisipasaun polítika feto no redusaun ba violénsia hasoru feto. Sira mós hala’o atividade ba hakbiit feto iha área ekonomia, ne’ebé kobre suku 12, iha distritu haat, maka hanesan Baukau, Lautém, Manatutu no Viqueque. Programa ne’e mós konsege halo progresu no fó benefísiu di’ak ba feto, hanesan programa kombate analfabetizmu, hanorin feto ba administrasaun jestaun no kapasita feto sira oinsá bele dezenvolve sira-nia suku’’, tenik Sekretária Estadu Promosaun Igualidade.
Entertantu, Reprezentante Paz y Desarollo Rejionál Ásia, Noelia Monge Vega hatete katak, “implementasaun programa ne’e, Paz y Desarollo simu apoiu hosi Ajénsia España ba Kooperasaun Internasionál no Dezenvolvimentu (AECID), ne’ebé hala’o programa kona-ba hakbiit feto iha Ásia, hanesan iha nasaun Bangladesh, Cambodia, Filipina, Timor-Leste no Vietnam. Programa ne’e koordena hosi Edifísiu Paz y Desarollo Regionál Ásia no hahú iha fulan Setembru, tinan 2010 no remata iha Setembru tinan 2014. Ami tinan hitu ona hala’o atividade iha Timor-Leste. SEPI mak ami nia parseiru estratéjiku atu atinji objetivu hakbiit feto no promove igualdade”.
