Governu Timor-Leste

Ministru Justisa, Dionísio Babo Soares, Ministru Negósiu Estranjeiru no Kooperasaun, José Luís Guterres no Sekretáriu Estadu Seguransa, Francisco Guterres, hala’o sorumutu, iha Gabinete Ministru Negósiu Estranjeiru no Kooperasaun, iha loron 24, fulan Abríl, tinan 2013 hodi ko’alia kona-ba prevensaun droga iha Timor-Leste.

Hafoin hasoru malu Ministru Justisa, Dionísio Babo Soares hateten katak, “ohin ami mai hamutuk iha ne’e ho objetivu atu ko’alia kona-ba problema droga ne’ebé tama mai Timor-leste hodi fó impaktu ne’ebé ladi’ak ba iha ita nia joven sira nia futuru.

“Hanesan ita hotu hatene katak, agora daudaun droga hahú tama barak iha Timor-Leste, oinsá  ita atu hola medida sira prevensaun nian no oinsá ita bele halo kooperasaun di’ak ho país viziñu sira hanesan Indonézia, Austrália, Singapura no Malázia hodi previne droga ne’ebé  tama mai ita nia nasaun liuhusi fronteira”, dehan Ministru Justisa, Dionísio Babo Soares.

“Bainhira ita lahalo prevensaun maka sei fó impaktu negativu ba ita nia rain liuliu ba juventude sira ne’ebé komete krime droga hodi estraga sira nia futuru”, hatutan Dionísio Babo Soares.

Nia informa mós katak, agora daudaun Ministériu Justisa iha Polísia Investigasaun Kriminál, sira ne’e bá tuir formasaun iha Portugál iha área espesífiku ba krime sira ne’e liuliu droga.