Ministru Negósiu Estranjériu no Kooperasaun simu vizita ofisiál hosi Vise-Ministru Negósiu Estranjériu Japaun nian
Ministru Negósiu Estranjériu no Kooperasaun Timor-Leste, José Luís Guterres, simu vizita ofisiál hosi Vise-Ministru Negósiu Estranjériu Japaun, Minoru Kiuchi ho ninia delegasaun iha loron 22 Fulan Abril 2013, iha salaun enkontru edifísiu Ministériu Negósiu Estranjériu no Kooperasaun, iha Dili.
Objetivu hosi vizita ne’e, atuhodi haree besik liu kona-ba ita nia rain, ba koperasaun ne’ebé durante ne’e hala’o tiha ona no fó kontinuidade apoiu ba Governu Timor-Leste.
Hafoin enkontru ne’e Ministru Negósiu Estranjériu no Kooperasaun, José Luís Guterres hateten katak “Ne’e vizita ba dala uluk Vise-Ministru Negósiu Estranjériu Japaun nian mai Timor-Leste hosi Governu eleitu. Nia apresia tebtebes ho prosesu dezenvolvimentu iha ita nia rain, ho konfiansa boot tebes sira fiar katak ita sei iha dezenvolvimentu ne’ebé di’ak no lalais liu fali hosi nasaun sira seluk”.
Ministru Negósiu Estranjériu no Kooperasaun mós dehan “ita kria mós konfiansa ba iha komunidade internasionál katak, sira bele tau osan iha ita nia rai, sira nia emprezáriu sira bele mai investe iha ne’e. Importante mak ita nia Nasaun ne’e moris ho estabilidade no moris iha sistema demokrasia, ho nune’e ita tenke valoriza diálogu, valoriza solusaun pasífika hodi rezolve problema ka konflitu iha ita nia rai laran”.
