Ministru Obras Públikas hala’o vizita ba distritu Oekusi Ambeno
Ministru Obras Públikas Gastão de Sousa, akompaña husi Diretór Nasionál Estrada Ponte no Kontrola Xeias, Rui Hernani nomos Diretór Nasionál Institutu Jestaun Ekipamentu (IGE), Egas Lemos, iha loron 16 fulan Abril hala’o vizita ba distritu Oekusi Ambeno, ho objetivu hodi haree besik ba kondisaun husi ajénsia Ministériu Obras Públikas nian mak hanesan Obras Públikas, Água no Saneamentu, EDTL nomós Institutu Jestaun Ekipamentu (IGE) iha distritu Oekusi Ambeno.
Aleinde ne’e, haree mós projetu ba futuru no projetu saida mak hala’o dadauk ona, ne’ebé haree liuliu ba projetu fundu infraestrutura sira nian.
Iha vizita ne’e, Ministru ho ninia komotiva hala’o sorumutu ho Xefe Regionál MOP no funsionáriu husi Obras Públikas, EDTL, SAS, IGE iha distritu Oekusi Ambeno, atu bele rona diretamente difikuldade saida maka ajénsia hirak ne’e hasoru.
Hatan ba preokupasaun balun husi ajénsia MOP nian, Gastão de Sousa, dehan, “ami tau iha konsiderasaun ba imi nia situasaun, maibé tenke iha pasiénsia, tanba buat hotu labele halo dala ida de’it iha tinan ida nia laran.
Ita ko’alia kona-ba rejionál ne’e sei lakon, ne’ e sei tau iha distritu ida-idak para responsável iha distritu halo fiskalizasaun no monitorizasaun ba projetu sira. Tan ne’e, ami hein estrutura Diresaun Jerál aprova ona, ita prontu bele nomeia ema atu tur iha fatin sira ne’e hodi bele halo servisu ho di’ak,” hateten Gastão de Sousa.
Hafoin hala’o tiha sorumutu, Ministru Obras Públias Gastão de Sousa, akompaña husi Diretór Nasionál Estradas Ponte no Kontrola Xeias, Rui Hernani, Xefe Regionál Oekusi Ambeno nian, hala’o vizita ba Mota Tono iha Lifau.
