Governu Timor-Leste

Ministériu Obras Públikas (MOP), iha loron 24 fulan Abríl, asina kontratu ho Banku Aziátiku Dezonvolvimentu (ADB) kona-ba kontratu projetu ne’ebé hanaran Contract Package-R3, ba reablitasaun estrada Dili ba Likisá.

Iha diskursu Ministru Obras Públikas, Gastão de Sousa, hatete “asinatura ida ne’e signifikante teb-tebes tanba projetu ne’e marka inísiu obra ne’ebé finansia husi empréstimu ba dahuluk, ne’ebé Timor-Leste foti  hodi halo dezenvolvimentu nasionál.

Projectu pakote–R3 ho montante dólar amerikanu liu milaun ruanulu ne’e, atu hadi’a no halo luan estrada ho naruk besik kilómetru 29 iha trosu estrada Dili-Likisá. Ministru esplika tan katak,  aleinde projetu ida ne’e, ADB mós fó tiha ona apoiu ho forma the grant ba Governu Timor-Leste, liuhosi koperasaun finansiamentu ba Estrada nasionál husi Likisá to’o Mota-ain.

“Estrada hirak ne’e ita sei hala’o tuir padraun internasionál, ne’e duni bainhira projetu hirak ne’e remata iha 2017, ita sei iha Estrada Dili ba Mota-ain ho kondisaun di’ak liután  no sei fó impaktu pozitivu ba dezenvolvimentu ekonómiku Timor-Leste,” dehan Gastão de Sousa.

Iha fatin hanesan, konstrutór San Jose, S. A. husi nasaun España  ne’ebé manan kontratu ne’e hatete, “projetu hadi’a estrada ne’e sei kompleta iha loron 640 nia laran, sei hahú iha tinan 2013 nia klaran no sei remata iha trimester daruak 2015”.