Governu Timor-Leste

Nu’udar parte husi planu tranzisaun UNMIT nian, no haree ba katak tranzisaun ne’e sei termina iha tempu badak, nune’e iha loron 19 fulan Abríl, UNMIT entrega tán sasán balun iha Diresaun Nasionál Jestaun Patrimóniu Estadu nian.

Husi sasán hirak ne’ebé entrega ba Governu Timor-Leste, mak hanesan, armazén 3, karreta 21, empilladora 1, komputadór IBM 550 no impresora balun no ekipamentu komunikasaun nian lubuk ida.

Reprezentante UNMIT nian, Lourenço Alves, haktuir katak, ida ne’e la’ós entrega ikus nian, tuir previzaun, entrega ikus liu sei hala’o iha loron 24 fulan Juñu. Sasán hirak ne’ebé sei entrega iha tempu ne’e mak, kareta 10, konjuntu ekipamentu médiku nian balun no sasán balun ne’ebé iha relasaun ho Unidade Krime Grave sira nian sei entrega ba Governo Timor-Leste.

Lourenço Alves hato’o ninia agradesimentu ba Governu Timor-Leste, liuliu ba Diresaun Nasionál Jestaun Patrimóniu Estadu, ba koperasaun di’ak atu hala’o entrega sasán sira husi UNMIT, hahú husi uluk nian to’o agora, hala’o ho suseu.

Diretora Diresaun Nasionál Jestaun Património Estadu nian, Evangelina Guterres, ne’ebé reprezenta Ministériu Finansa no Governu Timor-Leste, agradese bá UNMIT ba doasaun ida ne’e, liuliu tanba manteim no kuidadu nafatin sasán hirak ne’e iha armazén UNMIT nian to’o oras ne’e.

Liutiha serimónia badak ne’e, reprezentante hosi Governu no UNMIT nian, halo inspesaun ida bá sasán sira iha fatin ne’e atu determina nia kondisaun lolós molok Governu simu.