Forsa Defeza EUA prontu atu fó treinamentu ba F–FDTL
Sekretáriu Estadu Defeza, Júlio Tomás Pinto, partisipa Sorumutuk Bilaterál Anuál Defeza nian entre Timor-Leste ho Estadus Unidus Amérika (EUA), ba-dahaat, iha Hawai, loron 9 to’o loron 11, fulan Abril, tinan 2013.
Iha sorumutuk bilaterál ne’e, Júlio Tomás Pinto, hateten katak, “iha tempu oin mai Estadu Unidus Amérika sei kontinua fó apoiu ba Timor-Leste iha área Defeza, liuliu ba Forsa F–FDTL”.
“Iha konkordánsia ne’ebé mak ita halo oinsá iha ezersísiu hamutuk entre forsa nasaun rua nian kada tinan bele halo no kontinua beibeik iha futuru. Ita mós husu ba Forsa Defeza Estadu Unidus Amérika nian atubele fó kursu ba ita-nia Forsa sarjentu sira ho naran Non Comision Officer Academic. Kursu ida ne’e sei hala’o iha Timor-Leste no sei envolve asesór Portugués sira ne’ebé durante ne’e fó apoiu ba kursu ida ne’e. Sira mós fó oportunidade ba ita-nia Forsa Komponenti Navál sira atu bele ba tuir kursu iha Amérika” dehan Sekretáriu Estadu.
Kona-ba oportunidade ne’e, Júlio Tomás Pinto, esplika tan katak, “sei fó oportunidade uluk ba membru F–FDTL ne’ebé mak oras daudaun tuir hela kursu inglés iha Metinaru, maibé la taka dalan ba sira seluk atu tuir mós foti kursu ida ne’e, tanba Estadus Unidus Amérika sei fó apoiu nafatin ba F–FDTL iha formasaun oin-oin.
Delegasaun Timor-Leste ne’ebé partisipa iha Sorumutuk Bilaterál Anuál Defeza entre Timor-Leste ho Estadus Unidus Amérika mak hanesan, Sekretáriu Estadu Defeza, Júlio Tomás Pinto, Vise Xefe Estadu Maiór Jenerál F–FDTL, Brigadeiru Jenerál Filomeno Paixão de Jesus, Xefe Kaza Militár Prezidénsia Repúblika, Koronél José da Costa Soares “Trix”, Diretór Planeamentu Estratéjiku ho Politíka Internasionál, Martinho Maia Gonçalves.
