Governu Timor-Leste

Ministériu Finansas, ne’ebé mak reprezenta hosi ninia Direktór-Jerál, António Freitas, iha loron 16 Abril 2013, iha Balide, hala’o  serimónia ida kona-ba distribuisaun kareta sira ne’ebé simu hanesan doasaun hosi UNMIT, ba ministériu  no ajénsia estatál nian sira.

António Freitas fo hatene katak kareta  hirak ne’ebé mak fahe ne’e, bazeia ba proposta hosi Ministériu sira iha OJE tinan 2013 nian, no mós iha méritu ajénsia sira nian. Ministériu no ajénsia sira ne’ebé simu kareta hirak ne’e mak Gabinete Prezidénsia Repúblika nian (2) Parlamentu Nasionál (4) Gabinete Primeiru-Ministru (1), AND (1), NPC (1), SNI (1), IGE (1), Gabinete Vise-Primeiru-Ministru (3), MPCM no Sekretaria Estadu hirak tama iha ninia lideransa  (7), SEPI (1) SEJD (1) SEPFOPE (2) SED (1) SES (4) MDS (1) MNEC (2) ME (6) MS (6), MJ (6) MSS (3) MOP (4) MPRM (3) MF (5) MTC (5) MCIA (3) Tribunál (4) PGR (3) PDHJ (2) CNE (2) CAC (2) CFP (3) no RTTL (2). Kareta sira ne’ebé mak atu fahe hamutuk 217 no iha tempu besik sei fahe tan iha segundu lote.

Diretór-Jéral Finansa hakarak afirma katak, kareta hirak ne’e  (barak liu ho marka Prado) nia kondisaun di’ak hela. Tanba ne’e, mak hodi Primeiru Ministru ho Ministra Finansa sira nia naran hakarak fo hanoin ba sira ne’ebé mak simu kareta hirak ne’e atu kaer didi’ak no mós fo hanoin ba iha reprezentante husi benefisiáriu sira atu haré didi’ak kareta nia kondisaun ho asesóriu sira, atu labele reklama  fali iha tempu  ikus, tanba bainhira ajénsia simu ona, nia mak hanesan úniku responsável ba kareta ne’e, no la’os fali Ministériu Finansa.

Bainhira hatan ba jornalista sira kona-ba manutensaun, António Freitas, esplika katak , maski Governu envezde sosa kareta iha 2013, nia prevee tiha ona  iha Orsamentu Jerál Estadu nian, manutensaun ba kareta sira ne’e, tuir  kuantidade ne’ebé mak ajénsia ida-idak hetan