Governu Timor-Leste

Ministru Komérsiu Indústria no Ambiente, António da Conceição, iha segunda-feira, loron 22 fulan Abril, ofisialmente lansa programa formasaun ba kandidatu motivadór kooperativa, mikro no empreza ki’ik sira, ba dahuluk. Formasaun ne’e hala’o iha fatin Eskola Sekundária 10 de Dezembro, iha Comoro, loron 22 fulan Abril to’o loron 1 fulan Maiu.

Objetivu hosi formasaun ne’e atu motiva kooperativa, mikro no empreza ki’ik sira iha futuru nune’e bele dezenvolve di’ak liu tan ekonomia iha Timor-Leste. Kandidatu ba formasaun ne’e hamutuk ema na’in hitu nulu mai hosi grupu sira distritu Díli nian.

António da Conceição iha nia diskursu hatete, “husu ba kandidatu sira ne’ebé maka  partisipa iha formasaun ne’e, atu aproveita oportunidade ne’e tanba imi mak sei sai hanesan motivadór ba kooperativa, mikro no empreza ki’ik sira nian. Nune’e ba futuru kooperativa, mikro no empreza Ki’ik sira iha Timor-Leste bele dezenvolve di’ak liután, tanba sira hanesan mós pilar ida ne’ebé importante ba dezenvolvimentu ekonómiku rai laran nian”.

Formasaun hanesan sei kontinua ba distritu Baucau no Bobonaro.