Governu hahú Formasaun ba Jornalista Rádiu nian
Sentru Formasaun Téknika iha Komunikasaun (ho sigla CEFTEC) no Sentru Protokolár Formasaun Profisionál Jornalista nian (ho sigla CENJOR) hahú formasaun ba jornalista rádiu nian iha fulan Abril, iha CEFTEC nia fatin, iha Dili. Ida ne’e hanesan formasaun daruak ne’ebé Programa Komunikasaun Sosiál Uniaun Europeia (UE) hala’o iha área jornalizmu radiofóniku.
Kandidatu na’in 20 resin hosi rai-laran, hala’o ona ezame admisaun iha Palásiu Governu no formandu na’in 12 de’it maka hetan selesaun, hanesan tuirmai ne’e: na’in-rua hosi Rádiu Komunidade Laleia (Rádiu Na’in Feto) Distritu Manatuto nian, na’in haat hosi Rádiu Universitária Académica UNTL nian; na’in-ida hosi Rádiu Komunidade Maubisse; na’in-ida hosi Rádiu Timor-Leste; na’in-ida hosi Rádiu Komunidade Aileu; na’in-ida hosi Rádiu Klibur; na’in-ida hosi Sentru Rádiu Komunitária nian no Tékniku Komunikasaun Sosiál ida hosi Sekretaria Estadu Seguransa nian.
Asaun Formasaun ne’e hanesan faze daruak hosi programa formasaun espesializada ba jornalista sira (tinan 2013), ne’ebé hetan finansiamentu hosi UE iha ámbitu Programa Komunikasaun Sosiál.
Programa formasaun CEFTEC/CENJOR hakarak atu garante formasaun profisionál ne’ebé ho referénsia ba jornalista timoroan besik na’in 170, liuhosi kursu sira maka hanesan kursu Dalen Portugés nian ne’ebé Aplika ba Jornalizmu, Formasaun Formadór sira iha Komunikasaun Sosiál nian, Jornalizmu iha Asuntu Jurídiku, Jornalizmu Ekonómiku no Rádiu. Kursu sira ne’e organiza husi jornalista profisionál sira ho esperiénsia luan no hanesan formadór CENJOR nian.
