Governu Timor-Leste

Ministru Negósiu Estranjeiru no Kooperasaun, José Luís Guterres iha loron 1 to’o loron 2 fulan Abril 2013, partisipa iha Konferénsia Ministeriál Rejionál iha Bali da-lima kona-ba Kontrabandu, Tráfiku Umanu no Krime Transnasionál sira ne’ebé iha Relasaun, iha Bali, Indonésia.

Ministru Negósiu Estranjeiru no Kooperasaun, José Luís Guterres, iha ninia diskursu hato’o  kona-ba kompromisu politíku Estadu Timor-Leste nian ba luta kontra tráfiku umanu no krime organizadu transnasional. Konkretizasaun hosi polítika ida ne’e mak hamosu ona iha Konstituisaun RDTL, Kódigu Penál no esbosu Lei kona-ba Tráfiku Umanu. Esbosu Lei ne’e sei dezenvolve hosi MNEK no Ministériu Justisa no tuir planu esbosu lei ne’e rasik sei aprezenta ba konsellu Ministru iha tinan 2013 nia laran.

José Luís Guterres, hatutan, “kona-ba progresu servisu imigrasaun, mak hanesan sistema jestaun fronteira nian ne’ebé komesa implementa daudauk. Maski Timor-Leste la’os nasaun destinadu ba tráfiku umanu maibé oras ne’e sai nu’udar Nasaun tránzitu ba tráfiku umanu, liuliu ba iha nasaun Austrália no Indonésia. Tanba ne’e, kooperasaun di’ak ne’ebé durante ne’e hala’o ona entre Nasaun tolu (Timor-Leste, Indonésia no Austrália) hanesan parte pozitivu ida hodi kombate tráfiku umanu”.

Iha okaziaun ne’ebá Ministru, José Luís Guterres, halo sorumutu ho Ministru Negósiu Estranjeiru no Kooperasaun Austrália no Ministra Negósiu Estranjeiru Bangladesh nian hodi ko’alia kona-ba relasaun bilateral sira entre nasaun Austrália, Bangladesh no Timor-Leste. Aleinde ne’e Ministru mós hasoru malu ho Diretór-Jéral Organizasaun Internasionál ba Migrasaun, William Lacy Swing, hodi ko’alia kona-ba kooperasaun entre Timor-Leste ho organizasaun ne’e.