Governu Timor-Leste

Iha loron 22 fulan Marsu, Governu Timor-Leste liuhusi Diretór-Jerál Finansa Estadu nian, António Freitas, no husi Diretora Nasionál Jestaun Patrimóniu Estadu nian, Evangelina Guterres, iha Balide, simu tan sasán (bein) balun husi UNMIT, ne’ebé reprezenta husi Stephen Owen.

Iha okaziaun ne’e reprezentante UNMIT nian entrega sasán lubuk ida ne’ebé kompostu husi kareta hamutuk 30, ofisina manutensaun kareta nian ho ninia ekipamentu sira no mós pesa hamutuk rihun 200 resin.

António Freitas, hodi Governu nia naran agradese ba UNMIT ba dosaun hotu-hotu ne’ebé hetan ona hodi hateten katak ofisina Balide nian sei uza atu halo manutensaun ba kareta Governu nian sira, ne’ebé iha inísiu sei sai hanesan projetu-pilotu ida no iha iha futuru sei loke ba kareta husi ministériu hotu-hotu.

Diretór-Jerál Finansa Estadu nian afirma mós katak kareta hirak ne’ebé sira simu ne’e baibain utiliza ona tinan 3 to’o tinan 6 maibé iha kondisaun di’ak no UNMIT hanoin ona atu fó mós materiál telekomunikasaun nian no armazén tolu ne’ebé lokaliza iha área Fomentu nian.

Tuir Evangelina Guterres, marka ona atu entrega tán kareta 100 iha loron 27 fulan Marsu nian no 120 iha loron 3 fulan Abríl nian.

Tuir planu Governu nian, kareta hirak ne’e sei fahe ba ministériu sira no mós organizasaun sosiedade sivíl sira.