Governu Timor-Leste

Primeiru-Ministru, Kay Rala Xanana Gusmão, Segunda feira, loron 15 fulan Abril, hala’o divulgasaun ba matéria Desentralizasaun no Podér Lokál ba dahaat iha distritu Ainaro.

“Ha’u esplika dala barak ona katak, Polítika Desentralizasaun Administrativa no Poder Lokál, tulun tebes dezenvolvimentu setór privadu nian iha área rurál, promove mós instituisaun sira iha estadu ida forte, lijítimu no estavél, loke oprtunidade ba partisipasaun demokrátiku hosi sidadaun sira no harii prestasaun servisu públiku ida ne’ebé efetivu, efisiente no ekuitativu hodi nune’e bele apoia dezenvovimentu sósiu- ekonómiku Nasaun nian”, hateten Primeiru-Ministru, Kay Rala Xanana Gusmão.

Xanana esplika tan, “ko’alia kona-ba munisipalidade, bainhira atu estabelese, Ainaro oan sira presiza kompriende didi’ak objetivu hosi munísipiu ne’e rasik, signifika katak estabelese ona munisípiu, Ainaro-oan sira mak sei halo jestaun rasik ba rekursu no potensialidade sira ne’ebé iha hodi dezenvolve rasik distritu ne’e no hadi’a di’ak liután povu iha distritu ida ne’e nian atu  móris ho sustentabilidade. Tanba ita hasoru malu ohin, atu fó antebrani tán Ainaru-oan sira, grupu intelektuál, setór privadu, veteranu sira, grupu feto, ONG, no joventude, atu servisu hamutuk ho Administradór distritu, liuliu ho komisaun preparativu, líder komunitáriu, hodi hahú ona identifika poténsia no difikuldade sira ne’ebé  iha, atu diskute no halo planu hodi prepara atu simu munisípiu ho responsabilidade no responsabilizasaun.

Iha prosesu divulgasaun ne’e, Administradór distritu Ainaro entrega relatóriu servisu hosi komisaun preparativu ba estabelesimentu munisípiu iha distritu Ainaro nian ba Sua Exelénsia Primeiru-Ministru.

Distritu Ainaro iha nia luan 787 km², suku hamutuk iha 21 no ho ninia populasaun hamutuk ema 62.400. Atividade ekonómiku prinsipál sira iha distritu ne’e mak, agrikultura subsisténsia iha propriedade sira familia nian no kafé, ho poténsia dezenvolvimentu ekonómiku iha área sira kafé, turizmu nian no kolleita hahan espesializada sira no ortikultura, peska komersial iha bee mota no hakiak animál sira (karau).