Primeiru-Ministru foti Profesór Sukehiro Hasegawa sai nu’udar nia Asesór Espesiál
Primeiru-Ministru Repúblika Demokrátika Timor-Leste, Kay Rala Xanana Gusmão, foti Profesór Sukehiro Hasegawa, uluk Reprezentante Espesiál Sekretáriu-Jerál Organizasaun Nasoins Unidas (ONU) nian iha Timor-Leste, nu’udar nia Asesór Espesiál iha matéria Governasaun Di’ak no Dezenvolvimentu.
Primeiru-Ministru hateten katak: ”ita halo hela servisu tuir ita nia Planu Estratéjiku Dezenvolvimentu 2011-2030, atu dezenvolve ita nia nasaun no hadi’a ita nia povu nia kondisaun moris nian. Iha tempu ne’ebé Governu fó nia atensaun iha implementasaun projetu sira iha mandatu ne’e nia laran, importante tebes atu estabelese sistema governasaun di’ak ida atu nune’e ita bele konkretiza ho efetivu ita nia prioridade sira.”
“Parte ne’ebé iha relasaun ho Jestaun Setór Públiku nian no Governasaun Di’ak kona-ba Planu Dezenvolvimentu Estratéjiku estabelese reforma lubuk ida tuir kondisaun governasaun di’ak ne’ebé mak sei reforsa ita nia sistema Governu nian. Ho Sr. Hasegawa nia esperiénsia internasionál ne’ebé barak iha matéria governasaun di’ak no dezenvolvimentu, nia sei horik iha pozisaun di’ak atu fó mai ita asesoria espesializada kona-ba opsaun sira ne’ebé ita atu tuir ne’ebé bele loke dalam mai ita atu halo progresu iha implementasaun reforma hirak ne’e”, Primeiru-Ministru esplika.
“Aleinde esperiénsia no koñesimentu ne’ebé mak nia iha, Profesór Hasegawa komprometidu ho moris-di’ak ba povu timor nian. Iha tempu ne’ebé nia reforma ona husi Nasoins Unidas, Sr. Hasegawa simu atu sai nu’udar ha’u nia Asesór Espesiál”, Primeiru-Ministru hateten.
Profesór Sukehiro Hasegawa iha kareira tinan 37 iha ninia servisu ba Nasoins Unidas molok reforma iha fulan Setembru nia rohan tinan 2006. Nia sai hanesan Reprezentante Espesiál Sekretáriu-Jerál ONU nian ba Timor-Leste husi loron 21 fulan Maiu tinan 2004 to’o loron 30 fulan Setembru tinan 2006, nia mós hala’o servisu hanesan Xefe Misaun Apoiu Nasoins Unidas nian iha Timor-Leste (UNMISET) husi fulan Maiu tinan 2004 to’o fulan Maiu tinan 2005; Xefe Gabinete Nasoins Unidas nian iha Timor-Leste (UNOTIL) husi fulan Maiu tinan 2005 to’o fulan Agostu tinan 2006; Xefe Misaun Integrada Nasoins Unidas (UNMIT) nian husi loron 25 fulan Agostu to’o ba loron 30 fulan Setembru tinan 2006. Husi fulan Jullu tinan 2002 ba fulan Jullu tinan 2006, Sukehiro Hasegawa sai mós hanesan Kordenadór Rezidente Nasoins Unidas nian ba Timor-Leste no Reprezentante Rezidente Programa Nasoins Unidas nian Dezenvolvimentu (PNUD).
