Governu Timor-Leste

Polísia Nasionál Timor-Leste (PNTL) selebra loron aniversáriu ba dala sanulu-resin-tolu ho tema “Husi Komunidade, Ho Komunidade no Ba Komunidade”, iha Kuartel Jerál PNTL, Kaikoli, iha loron 27 fulan Marsu.

Iha selebrasaun ne’e, komandante jerál PNTL Longuinhos Monteiro, iha nia diskursu hateten, “ PNTL la’os hanesan Polísia Nasionál iha tinan sanulu resin rua ba kotuk, tanba PNTL ohin iha ninia pozisaun rasik hodi defini no orienta atividade Operasionál nian tomak, hodi la depende ba podér suprevizionamentu UNPOL nian.

“Iha tinan haat nia laran Polisia Nasionál halo esforsu maka’as hodi marka nia pozisaun ida tuir kritériu ne’ebé misaun UNMIT impoin liuhosi rekezitu ne’ebé ita koñese ho naran Akordu Suplemetár, ita konsege hala’o duni knaar sira ne’e ho padraun orientadór ne’ebé ita-nia Governu fó hodi determina ita-nia pozisaun rasik sobre pozisaun polítika Nasoens Unidas ninian”, dehan Longuinhos Monteiro.

Komandante jerál PNTL mós hatutan, “Polisia Nasionál iha misaun ne’ebé mak boot no luan iha kontestu seguransa interna no repúblika nian tuir kompeténsia legál ne’ebé lei atribui ba instituisaun ida ne’e. Tanba ida ne’e duni maka Polisia Nasionál tenke iha preparasaun no kapasitasaun ida adekuada hodi asumi ninia responsabilidade sira ne’e tuir misaun no kompeténsia hahú husi atividade baibain nian iha interasaun loron-loron ho komunidade to’o intervensaun sira estraordinária iha kontestu orden públika nian ho materiál sira seluk ne’ebé iha ligasaun ho atividade kriminoza organizada iha Estadu Timor-Leste ne’ebé ninia povu hahú dezenvolve iha setór sira oioin.

“Ha’u bolu imi hotu nia atensaun atu fó hanoin ba imi hodi halo reflesaun ba empeñamentu ne’ebé ita alkansa iha tempu horseik nian no marka imi-nia pozisaun foun nu’udar servidór Estadu, liuhosi imi-nia komportamentu, responsabilidade morál no profesionál ba ita-nia kompromisiu pesoál, koletivu no institusionál ba misaun aban bain rua nian. Nune’e mós ha’u husu ba komandante sira hotu hahú husi postu sira ka eskuadru sira, komandu distrit’al sira, ita hotu hamutuk iha tinan 13 nia laran, ita hotu hatudu ita-nia maturidade no disiplina bainhira kumpri ita-nia devér no obrigasaun ho serbí ho responsabilidade tomak nu’udar servidór Estadu nian, hodi hatudu dala ida tan katak mehi ne’ebé ita hotu hein, povu ne’e hein, bele sai duni realidade liuhosi ita-nia dedikasaun, Parabens ba Polísia Nasionál Timor-Leste! Parabens ba Ita hotu!”, tenik Longuinhos Monteiro.

Iha fatin hanesan Primeiru Ministru no Ministru Defeza no Seguransa, Kay Rala Xanana Gusmão, hateten, “Tempu sei naruk atu ita hotu bele dehan katak kondisaun hotu-hotu ne’ebé PNTL buka ka presiza ita sei hatán ba. Hadi’a nafatin ierarkia komandu nian, hadi’a disiplina, hadi’a étika, hadi’a imi-nia relasaun sira ho komunidade sira, imi mai husi komunidade tanba imi povu nia oan, ho komunidade tanba imi tenke servisu loroloron ho ita-nia populasaun, ba komunidade tanba imi tenke serbí. Serbí ho di’ak ba, serbí instituisaun, tau instituisaun ninia interese ás liu ida-idak nia interese hodi kaer metin atu ita bele serbí di’ak liután. Parabens ba imi, konfiansa nafatin ba imi, ba imi-nia melloria iha loron idak-idak”.

Prezidente Repúblika, Taur Matan Ruak, husu ba ofisiál, sarjentu, ajente polísia hotu-hotu atu kontinua nafatin halo buat ne’ebé di’ak ba ita-nia nasaun no povu hanesan tinan 13 imi halo ona, no halo di’ak liután tanba prestíjiu, kredibilidade ne’e ema la fó iha bandeja, ne’e mai husi ita-nia esforsu rasik, serbisu no disiplina ne’ebé ita hatudu ba ema hotu”.