Inaugurasaun Sentru produsaun fini kadiuk no ikan
Ministru Agrikultura no Peska, Mariano “Assanami” Sabino, hamutuk ho Embaixadora Estadus Unidus Amérika Judith R. Fergins iha loron 8 fulan Marsu 2013, ofisialmente inaugura Sentru Produsaun Fini Kadiuk no Ikan iha Oralan, Sub-Distritu Vemase, Distritu Baukau.
Ministru Agrikultura no Peskas Mariano “Assanami” Sabino, iha nia diskursu hateten, “Sentru produsaun ida ne’e harii tanba Governu Timor-Leste servisu hamutuk ho governu amerikanu, liuhosi sira nia implementadór, ACDI/VOCA (Agricultural Cooperative Development International/Volunteers in Overseas Cooperative Assistance), hodi haki’ak kadiuk no ikan. Ita hotu hatene katak, kadiuk ne’e fulan ida de’it bele hetan nia oan to’o rihun rua nulu, no tinan ida nia bele hetan oan to’o rihun atus rua haat nulu”.
Assanami mos husu ba agrikultór sira, liliu sira ne’ebé hakarak haki’ak kadiuk, “ita sei fasilita maibé tenke sériu no disiplina, tanba kadiuk ida de’it ho ninia kilograma ida, ninia valór ekonómiku ne’e bele to’o dólar sanulu ka liu bainhira ba fa’an iha Díli”.
Iha fatin hanesan Embaixadora Estadus Unidus Amérika, Judith R. Fergins, hateten katak, “Ha’u hein katak, sentru produsaun fini kadiuk no ikan ne’e, la’os ba daikus nian, tanba Timor-Leste iha ninia tasi ibun ho kilómetru atus hitu liu ne’e iha poténsia bo’ot, hodi fó oportunidade di’ak ba familia sira iha Timor-Leste atu servisu maka’as, liliu família sira ne’ebé hela iha área tasi ibun hodi aumenta imi nia rendimentu”.
“Governu Amérika orgullu tebes sai nu’udar parseiru permanente ba governu Timor-Leste, koopersaun ne’e hametin liután, bainhira Hillary Clinton, vizita Timor-Leste iha Setembru tinan kotuk hodi hasoru malu ho Primeiru-Ministru Xanana Gusmão, ko’alia kona-ba setór agrikultura no peska nian ne’ebé importante tebes hodi kontribui ba dezenvolvimentu nasionál. Projetu sentru produsaun fini kadiuk no ikan ne’e hatudu katak nasaun rua ne’e sira nia kompromisu sai duni realidade”, hateten Judith R. Fergins.
