Governu Timor-Leste

Sekretaria Estadu Juventude no Desportu (SEJD), iha segunda-feira loron 4, fulan Marsu, kontinua fó kontratu ba treinadór internasionál hosi Indonézia, ne’ebé iha tinan 2011 treinadór ne’e mak fó treinamentu ba atleta kempo sira hodi hetan medalla osan mean iha Sea Games, Palembang, Indonézia.

Sekretáriu Estadu Juventude no Desportu, Miguel Manetelo, iha ninia intervensaun hateten katak “Governu kontinua fó kontratu ne’e, tanba atu prepara atleta sira federasaun Kempo nian hodi partisipa iha eventu Sea Games iha Dezembru tinan ida ne’e iha Birmânia. Kontratu ne’e nia durasaun fulan 10”.

Iha fatin hanesan, Henry Soselista, nu’udar treinadór internasionál promote katak, sei esforsu-an maka’as hodi fó treinu ba atleta sira, nune’e bele kompete iha eventu Sea Games, “Ha’u fiar katak federasaun Kempo sei hetan medalla osan mean rua ka tolu iha Sea Games Birmânia”.

Partisipa iha serimónia ne’e Sekretáriu Estadu Juventude no Desportu, Miguel Manetelo, treinadór Internasionál Dan VIII Henry Soselista, lideransa federasaun Kempo Timor-Leste, Diretór Nasionál no Xefe departementu iha Sekretaria Estadu Joventude no Desportu nian.