Projetu Resiklajen Lixu
Ministru Administrasaun Estatál, Jorge da Conceição Teme, organiza sorumutu koordenasaun ho embaixadór Brazil nian iha Timor-Leste, Edson Monteiro, hodi koa’lia kona-ba proposta atu apoia Timor-Leste iha projetu resiklajen lixu. Sorumutu ne’e hala’o iha loron 7 fulan Marsu 2013, iha Ministériu Administrasaun Estatál (MAE), Díli.
Ministru Administrasaun Estatál, hateten katak, “Ita tenke aprende ho nasaun sira hanesan Brazil, Índia no Áfrika do Sul, tanba sira mós hasoru problema hanesan ho ita, hodi nune’e ita labele repete fila fali problema ne’ebé sira enfrenta tiha on. Husu ba públiku tenke konsiente katak problema lixu ne’e problema ita hotu nian”. Ita hotu tenke iha duni konsiénsia hodi kombate problema lixu ba ita-nia di’ak no ita-nia moris saudável iha sidade, tanba sidade kapitál mak reprezenta imajen povu tomak nian. Ita mós tenke hateten ba ita-nia povu katak, tenke so’e foer iha ninia fatin, no foer ne’e tenke falun halo didi’ak, tanba foer ne’e mós iha valór ekonómiku, bainhira ita halo fali resiklazen”
Iha parte seluk, Ministru Komersiu Indústria no Ambiente, António da Conceição hateten, “iha diskusaun ba proposta hosi Brazil ninian atu apoia Timor-Leste iha prosesamentu Lixu nian, tanba ne’e ha’u mai partisipa hodi koopera ho Ministériu Administrasaun Estatál hodi tuur hamutuk koa’lia oinsá haree ba apoiu ruma ne’ebé maka tama hanesan daudauk Brazil, Índia no Áfrika do Sul nian hanesan fundu konjuntu ida atu apoia Timor-Leste iha resiklajen lixu nian.
Embaixador Brazíl Edson Monteiro, informa katak, “iha diskusaun ne’e ko’alia kona-ba idea balun ne’ebé ami iha ba projetu ida ne’ebé ami fiar bele kontribui atu hetan solusaun ba problema ne’e. Projetu ida ne’e la’os projetu brazileiru nian de’it. Ha’u kontenti tebes ohin mai koa’lia iha ne’e hodi brazil, India no Áfrika do sul nian naran, tanba hamutuk ita iha atividade kooperasaun ho nasaun dezenvolvidu sira seluk, harii fundu finasiamentu hosi projetu no ho ámbitu hosi fundu hanaran fundu IBA - India Brazil no Afrika do Sul tanba asuntu ne’e interesante tebes mai ami no mós ba Timor-Leste”.
