Governu Timor-Leste

Sekretáriu Estadu Konsellu Ministru, Avelino Maria Coelho da Silva, no Sekretáriu Estadu Komunikasaun Sosiál Nélio Isaac Sarmento, hala’o sorumutu loron 7 fulam Marsu, iha Palásiu Governu, ho reprezentante sira husi Portugál no Uniaun Europeia - “Camões, Institutu Kooperasaun no Língua nian”, “Gabinete ba Meiu sira Komunikasaun Sosiál nian”, “Uniaun Europeia no Embaixada Portugál - atu hato’o rezultadu sira husi programa Komunikasaun Sosiál Uniaun Europeia nian iha Timor-Leste.

“Fó apoiu ba implementasaun ba Polítika Nasionál Komunikasaun Sosiál nian” ne’ebé estabelese iha tinan 2010, mak objetivu Programa Komunikasaun Sosiál Uniaun Europeia nian iha Timor-Leste ne’ebé husi kedas tinan 2012 iha misaun atu reforsa pilár sira dezenvolvimentu nian husi setór media.

Programa ne’e bazeia iha área importante lima: Kriasaun Lei Jerál Komunikasaun Sosiál, harii mekanizmu autoregulasaun, formasaun tékniko-profisionál jornalista , aposta iha Informasaun Públika no prezervasaun no promosaun Memória Koletiva no Identidade Nasionál nian.

Ba programa ida ne’e, hala’o ona atividade sira promosaun no protesaun ba arkivu dijitál RTTL nian, formasaun ba jornalista sira iha lian Portugés, fó apoiu ba UNTL hodi haruka estudante na’in 6 ba  atu estuda ona iha Universidade Katólika, iha Portugál, ne’ebé sira hetan taxa aprovasaun por sentu 100% no mós harii ajénsia notísia nian ida.

Sorumutu ne’e mós sai hanesan razaun atu diskute projetu hirak ne’ebé mak prevee tiha ona ba 2013 hanesan: Hahú prosesu kona-ba aprovasaun Lei Jerál Komunikasaun Sosiál nian, Harii Konsellu Nasionál Imprensa no hakbiit kapasidade profisionál no institusionál husi setór komunikasaun sosiál nian.

Programa Komunikaaun Sosiál Uniaun Europeia nian ninia durasaun fulan 24 ( husi fulan Janeiru 2012 to’o fulan Dezembru tinan 2013) no bele atu hanaruk tan. Uniaun Europeia Konfirma ona katak projetu ne’e importante no konsidera iha posibildade atu hanaruk tan apoiu ne’e to’o tinan 2014, tinan ida tan husi tinan ne’ebé mak prevee tiha ona. Embaixada Portugál ne’ebé koa’lia hodi afirma  katak Governu Demokrátika Timor-Leste nian merese duni ba liberdade imprensa país nian, ne’ebé hetan ona rekoñesimentu iha nível internasionál, hodi reforsa sira nia hakarak atu apoia Timor-Leste, pelumenus to’o tinan 2015.

Tuir Pedro Braham da Costa, husi Gabinete Meiu sira ba Komunikasaun Sosiál nian, Timor-Leste sai hanesan nasaun dahuluk ne’ebé maka hetan benefísiu husi apoiu tékniku ida ne’e ne’ebé iha Portugál hanesan instituisaun referénsia nian husi administrasaun públika iha área média nian.