Governu Timor-Leste

Vise Primeiru-Ministru, Fernando La Sama de Araújo, hasoru malu ho Sekretáriu Ezekutivu KPLP, Isaac Murargy, iha Palásiu Governu, iha loron 19 fulan Fevereiru, hodi aproveita vizita Murargy nian mai iha Timor-Leste.

Isaac Murargy hela iha Timor-Leste durante semana ida nia laran ho objetivu atu hametin liután kooperasaun KPLP nian ho Estadu-membru ida ne’e, ne’ebé maka foin ba dahuluk, iha fulan Jullu tinan 2014, atu hala’o servisu prezidénsia rotativa Komunidade ne’e nian.

Fernando La Sama de Araújo ko’alia kona-ba knaar Timor-Leste nian iha Organizasaun ida ne’e hodi fó ninia-an tomak atu kolabora ba saida de’it maka presiza, atu  nune’e, reprezentasaun, iha mandatu tuirmai nian, bele sai di’ak, la’os de’it ba KPLP maibé mós ba Timor-Leste, no ida ne’e bele halo populasaun sira tau iha prátika, iha sira nia moris loron-loron nian atu nune’e sira bele sente katak organizasaun ne’e mós sira nian hotu.

Sekretáriu Ezekutivu KPLP hatudu nia laran haksolok, tanba nasaun ida ne’e hala’o duni ninia dezenvolvimentu ho laran no lori benefísiu ba povu timoroan sira hotu, liuhosi relasaun di’ak ne’ebé nia hala’o ho nasaun-membru sira seluk, no sira ko’alia mós kona-ba relasaun ho Guiné-Bissau.

Isaac Murargy iha biban ida ne’e hateten katak, importante tebes atu hametin liután kooperasaun ida ne’ebé hatudu rezultadu di’ak iha área hothotu. Tuir nia, iha nasaun barbarak mak iha kbiit ekonomia nian maibé tenke haka’as-an liután, tan ne’e, importante tebetebes atu ema hotu-hotu servisu hamutuk hodi bele promove kreximentu KPLP nian.