Konferénsia internasionál kona-ba Ajenda Dezenvolvimentu depoiz de 2015
Governu Timor-Leste, liuhosi Ministériu Finansa, sei organiza konferénsia internasionál kona-ba Ajenda Dezenvolvimentu depoiz de 2015 ho tema “Dezenvolvimentu ba ema hotu: Hapara Konflitu, Harii Estadu no Halakon Kiak”.
Konferénsia ne’e sei hala’o durante loron haat, hahú hosi loron 26 to’o loron 28 fulan Fevereiru 2013, iha Sentru Konvensaun Díli”, Vise-Primeiru-Ministru Fernando La Sama de Araújo hateten, iha konferénsia imprensa ne’ebé hala’o iha sala sorumutu Ministériu Finansa nian, iha loron 21 fulan Fevereiru.
Fernando La Sama de Araújo, hatutan tan, “iha tinan 2000 líder sira hosi nasaun 189 hasoru malu ona iha Nova Iorke hodi assina deklarasaun millenium ida ho objektivu prinsipál maka hanesan: Halakon kiak no hamlaha, atinje edukasaun primária universál, promove igualdade jéneru, redús mortalidade ba labarik, hadi’a saúde inan nian, kombate moras da’et hanesan HIV, TB no malária, asegura ambiente ne’ebé sustentável no promove parseiru ba dezenvolvimentu. Realidade hatudu katak nasaun frájil no pos-konflitu la konsege alkansa Objektivu Dezenvolvimentu Millenium (ODM), tanba dezafiu sei barak no nasaun barak iha mundu maka sei labele atinje trazetu ne’ebé deside ona, maka Sekretriu Jerál Nasoes Unidas nian, Ban Ki-Moon estabelese Painel Altu Nível ida”.
Vise-Primeiru-Ministru ne’e subliña liután katak “rezultadu hosi Konferénsia Internasionál ida ne’e maka “Dili Konsensus”, atu bele informa no fó influénsia ba prosesu relatóriu hosi painél Nível Altu Nível nian atu nune’e bele kontribui ba iha ajenda Dezenvolvimentu depoiz de 2015.
Sei partisipa iha konferénsia internasionál ida ne’e nasaun hamutuk 45 no partisipante sira besik 200. Hosi partisipante sira ne’e iha mós partisipante Nível Altu sira hanesan, Prezidente Repúblika hosi Kitibati, Primeiru-Minsitru hosi Solomon Island no mós Ministru sira hosi g7+ no Pasifik”, hateten Fernando La Sama de Araújo.
Molok atu remata, Vise-Primeiru-Ministru mós husu ba populasaun sira iha Timor-Leste, liu-liu ba populasaun sira ne’ebé hela iha Díli laran, atu simu ita-nia bainaka sira hodi hametin pás, disiplina, estabilidade, hakmatek no hatudu ita-nia ospitalidade ne’ebé maka di’ak nu’udar timoroan, ne’ebé nafatin valoriza ka tane ás ita-nia bainaka sira.
Partisipa iha konferénsia imprensa ida ne’e Vise-Ministru Negósiu Estranjeiru no Kooperasaun, Constâncio da Conceição Pinto, Ministru Turizmu, Francisco Kalbuadi Lay, Vise-Ministra Finansas, Santina Cardoso no mós Sekretáriu Estadu Komunikasaun Sosiál, Nélio Isaac Sarmento.
