Governu Timor-Leste

Ministériu Justisa fó pose ba membru Konsellu Jestaun no Disiplina Advokasia nian, iha Segunda-feira, loron 11, fulan Fevereiru  2013, iha Sentru Formasaun Jurídiku, Kaikoli,Dili.

Ministru Justisa fó Pose ba Membru Konsellu Jestaun no Disiplina Advokasia nian hamutuk ema na’in hitu ne’ebé ativu, mak Nelinho Vital eleitu hanesan prezidente, António Gonçalves, Fernando Lopes, Manuel Tilman, Pedro Aparício de Oliveira no hanesan membru suplente mak Fransisco de Araújo Almeida, no Helena Pereira.

Ministru Justisa, Dionísio Babo, hateten katak, “Timor-Leste ohin loron marka tán istória foun iha setór judisiál nian, tanba durante ne’e laiha konsellu ida tau matan ba servisu advogadu sira nian. Tanba ne’e, Governu, hakarak estabelese Konsellu Jestaun Disiplina Advokasia nian hodi tau matan ba advogadu privadu sira atu bele fó asisténsia legál ba ita nia povu ne’ebé mak hakarak hetan justisa”.

Dionísio Babo hatutan tan katak “Konsellu ida ne’e harii ho apoio finanseiru Governu nian liuhosi Ministériu Justisa no iha futuru konsellu ida ne’e, bele sai mós hanesan Defensoria Públiku ida no bele hetan tulun finanseiru husi Estadu”.

Iha fatin hanesan prezidente ne’ebé eleitu, Nelinho Vital, iha ninia diskursu hateten katak, “Konsellu Jestaun no Disiplina Advokasia nia objetivu la’ós de’it  atu proteje advogadu sira nia direitu, maibé konsellu mós iha obrigasaun atu haree kona-ba oinsá hala’o jestaun disiplinar advokasia nian. Hanesan profisaun ne’ebé ho karákter independente, kestaun étika profesionalizmu advogadu nian, tenke hasa’e prestasaun servisu komunidade nian tuir lei no ordem públika”.

Hafoin simu tiha pose ne’e, konsellu sei hala’o asaun hodi organiza funsionamentu servisu advogadu sira nian liuhosi inskrisaun no ikus mai sei hasai kartaun identidade advogadu sira nian.