Governu Timor-Leste

Polisia Nasionál Timor-Leste (PNTL), iha segunda-feira loron 11, fulan Fevereiru, tinan 2013, hala’o serimónia ofisiál graduasaun ba rekrutadu ajente polísia foun hamutuk 249, iha Sentru Formasaun Polísia Akadémia, Kumoro, Díli.

Iha fatin hanesan, Komandante Jerál, Komisáriu Longuinhos Monteiro, iha nia diskursu hateten katak, molok ajente sira hetan graduasaun, sira hala’o uluk treinamentu báziku iha Rai-Robo fulan tolu, kontinua formasaun akademia durante fulan hitu, hafoin halo estájiu durante fulan tolu, iha komandu no unidade departementu nian.

“Tuir oráriu iha semana oin, komando PNTL liuhosi Sentru Formasaun Polísia Akadémia simu fali kadete foun sira 248 ba faze daruak, hodi ba tuir treinamentu báziku iha Rai-Robo, tanba to’o tinan 2015 PNTL iha programa Governu nian atu aumenta tan membru efetivu 1000 hodi bele koloka ba iha teritóriu tomak”, tenik Longuinhos Monteiro.

Hafoin tau tiha diviza ba ajente sira nu’udar membru PNTL nian, iha diskursu Prezidente Tribunál Rekursu nian, Cláudio Ximenes, hato’o ba Membru PNTL foun ne’ebé foin simu graduasaun atu hala’o didi’ak sira nia kna’ar tuir Lei no Orden, ne’ebé mak tau ona iha PNTL ninia emblema no labele haree ba família, kór no partidu, atu nune’e ita-nia povu bele tau fiar no neon-metin ba servisu polísia sira nian iha futuru.

“Polisia iha obrigasaun bo’ot atu servisu tuir Lei, labele haree ba família, rasa no partidu hanesan imi halo tiha ona iha imi nia juramentu. Kaer metin Lei, ajenti ne’ebé  mak servisu hanesan ajente tenki servisu tuir Lei, tanba Lei mak fó regra sira, bainhira Lei laiha, ita la la’o tuir Lei, idaidak bele la’o tuir nia hakarak de’it”,  Cláudio Ximenes hateten.

Nia afirma tan katak, polisia mós hanesan pilár importante tébes ba nasaun ida ne’e, tanba sira mak fó apoiu ba seguransa rai laran nian bainhira desizaun ruma ne’ebé hasai husi Governu no Parlamentu Nasionál.

Iha serimónia graduasaun ne’e, partisipa hosi Brigadeiru Jenerál, Filomeno Paixão, Provedória Direitus Humanus no Justisa, Sebastião Dias Ximenes, adjuntu Komisáriu Anti Korrupsaun, José Neves, embaixadór sira, komandante no família sira hosi membru PNTL foun sira nian tomak.