Governu Timor-Leste

Ministériu Edukasaun (ME), iha loron ikus fulan Janeiru, hala’o diálogu kona-ba Asaun Konjunta Edukasaun nian iha Timor-Leste (AKETL), ho tema “Hamutuk Hanoin Hodi Hadi’a Kualidade Edukasaun iha Timor-Leste”, atividade ne’e hala’o iha Sentru Konvensaun Díli.

Objetivu hosi diálogu ne’e, mak bolu interveniente hotu-hotu hosi setór ne’e nian, atu fahe sira-nia esperiénsia no prátika di’ak kona-ba ensinu  no mós atu estabelese kompromisu ida iha nivél nasionál, ne’ebé sei habelar to’o distritu, sub-distritu no suku sira, liuhosi asaun konjunta ida ne’e.

Tuir Ministru Edukasaun nian, Bendito Freitas, iha nia diskursu hateten katak, edukasaun presiza iha koordenasaun di’ak ba servisu hosi parte hotu-hotu, atu nune’e bele hala’o governasaun ida di’ak no efisiente, hodi uza rekursu sira kona-ba edukasaun. “Ha’u hatene katak, laiha solusaun ida pré-definidu hodi hatán ba dezafiu sira iha edukasaun Timor-Leste nian, ne’ebé maka laiha relasaun ho ita-nia istória, sosiál no kulturál rasik. Iha diálogu ne’e, ita sei análiza no diskuti liu kona-ba diferensa kualidade hanorin nian hosi eskola públika sira no eskola privada sira”.

Iha fatin hanesan, Vise-Primeiru-Ministru, Fernando La Sama de Araújo, iha nia intervensaun hateten, “iha Planu Estratéjiku Dezenvolvimentu nian, fó sai mós kona-ba ita-nia vizaun ba edukasaun  katak, ema hotu-hotu iha direitu atu ba  eskola no simu edukasaun ho kualidade, hetan koñesimentu sira ne’ebé permite ba sira atu moris saudavél no produtiva, atu bele partisipa ativamente iha prosesu dezenvolvimentu nasionál”.

“Dezenvolvimentu iha setór edukasaun, nu’udar xave ba dezenvolvimentu rekursu umanu sira, liuliu ba futuru jerasaun foun nian no mós bele garante sustentabilidade ba ita-nia dezenvolvimentu iha área oioin”, reforsa Bendito Freitas.

Marka prezensa iha abertura diálogu ne’e Primeira Dama Isabel da Costa Ferreira; Deputadu Estanislau da Silva; Vise-Ministru Komérsiu, Indústria no Ambiente, Abel da Costa Ximenes; reprezentante Korpu Diplomátiku iha Timor-Leste; dirijenti sira instituisaun Estadu nian; Magnífiku Reitór sira hosi Universidade sira nian; Parseru Dezenvolvimentu Ministériu Edukasaun nian no reprezentante hosi Diretór sira eskola públika no privada iha distritu sanulu resin tolu nian.