Estadu Timor-Leste fó apoiu tomak ba Ramos-Horta ba misaun paz iha Guiné-Bissau
Prezidente Repúblika, Taur Matan Ruak, hateten Estadu Timor-Leste sei fó apoiu tomak ba José Ramos-Horta, nu’udar Reprezentante Espesiál Sekretáriu Jerál Nasoins Unidas nian ba Misaun Paz iha Guiné-Bissau. Chefe Estadu, hateten lia hirak ne’e, bainhira partisipa iha seremónia despedida Sua Eselénsia nian, iha segunda-feira, loron 4, fulan Fevereiru 2013, iha Komoro, Díli.
“Lori Estadu Timor-Leste tomak nia naran garante katak, Timor-Leste sei la husik José Ramos-Horta mesamesak iha misaun ida ne’ebé difisil, tanba ne’e, ami hotu iha ne’e, sei fó buat hotu ne’ebé Timor-Leste bele halo, atu nune’e misaun ida ne’ebé ita-boot simu bele hetan susesu ba Nasoins Unidas, ba CPLP no mós ba Timor-Leste”, esplika Taur Matan Ruak.
Reprezentante Espesiál Sekretáriu Jerál Nasoins Unidas nian ba Guiné-Bissau, José Ramos-Horta hateten, “Papél Nasoins Unidas nian, atu buka halo ponte ba autór nasionál ka rejionál sira hodi ko’alia oinsá atu bele hetan solusaun ba sira nia problema. Tanba ne’e, ha’u hateten ho haraik-an la’ós ha’u mak atu ba rezolve problema iha Guiné-Bissau, maibé Guiné-Bissau oan mak atu rezolve sira nia problema ho Nasoens Unidas nia tulun inklui mós Timor-Leste nia tulun.
Tuir planu nomeadu Misaun Espesiál ONU nian iha Guiné-Bissau ne’e, sei husik hela Timor-Leste iha loron 7 fulan Fevereiru, tinan 2013, akompaña hosi, tenente Luís da Silva, superentendente asistente, Ismail da Costa Babo, eskolta nain ualu no asessór ida.
Marka prezensa iha serimónia despedida ne’e, Prezidente Repúblika, Taur Matan Ruak Prezidente Parlamentu Nasionál, Vicente Guterres, Vise-Primeiru-Ministru, Fernando La Sama de Araújo, Prezidente Tribunal Rekursu, Cláudio Ximenes, Eis-Titulár, Membru Parlamentu Nasionál, membru Governu, Korpu Diplomátiku iha Timor-Leste, dirijente instituisaun independente sira hotu, reprezentante ONGs no komunidade balun.
