Governu Timor-Leste

Atleta nasionál sira Taekwondo nian, ne’ebé mak foin dadaun hetan kualifikasaun ás iha torneiu internasionál rua ,simu hosi Governu iha sorumutu Konsellu Ministru nian, iha loron 30 fulan Janeiru.

Ekipa ne’ebé akompaña hosi Sekretáriu Estadu Juventude no Desportu hamutuk ho treinadór, Luís Lemos, simu felisitasaun hosi Primeiro-Ministru no Ministru sira, tanba rezultadu hirak ne’ebé sira hetan. Atleta timor-oan rua hosi modalidade ida ne’e, sa’e ba Pódiun iha Open Indonézia nian, ne’ebé hala’o iha loron 14 to’o loron 16 fulan Dezembru, atu simu medalla osan mutin nian mak: Nilton Gilman Corte Real no Eulália da Conceição Amaral. Iha Laos, iha ASEAN University Games, ne’ebé hala’o iha loron 11 no 22 fulan Dezembru, simu mós medalla osan mutin mak atleta timoroan sira Taikwondo nian: Joannas Paulus Otnomen, António Pires no Celfia Maria Freitas.

Hodi hateke ba futuru, oras ne’e, ekipa ne’e, prepara-an atu hasoru Seagames 2013 nian, iha Myanmar, no Jogu sira CPLP nian, iha Goa.