Governu Timor-Leste

Governu, tuir Sekretária Estadu Apoiu no Promosaun ba Setór Privadu, Veneranda Lemos, no Sekretáriu Estadu Pekuária, Valentino Varela, loron 25, fulan Janeiru, tinan 2013, inaugura loja na’an Talho EBAI, iha Komoro, Beduku.

Serimónia inaugurasaun ne’e, organiza hosi Institutu Apoiu ba Dezenvolvimentu Emprezariál (IADE), ne’ebé iha Sekretaria Estadu Apoiu no Promosaun ba Setór Privadu nia okos. Serimónia ne’e hanesan eventu ida hosi programa ligasaun negósiu nian, nu’udar mós dalan ida oinsá bele fó apoiu ba empreza Talho EBAI, hodi hetan kompradór ne’ebé di’ak no sustentável hanesan super-merkadu, restaurante no otél sira.

Veneranda Lemos  hateten, “Loja Talho EBAI agora daudaun sai hanesan empreza únika ne’ebé fornese na’an fresku lokál ho padraun ijiene Internasionál, ne’ebé nia traballadór sira durante ne’e hetan formasaun hodi hasa’e sira nia koñesimentu hosi espesialista internasionál sira kona-ba oho karau no koa na’an ne’ebé ho kualidade di’ak, nu’udar atensaun espesiál ba iha aspetu ijiene no saúde publika”.

Tuir Veneranda katak, programa ligasaun negósiu ne’e, hanesan asisténsia foun ida husi IADE, atu fasilita emprezáriu sira, faze dahuluk hosi programa ne’e. IADE sei ajuda identifika no hala’o ligasaun entre parseiru empreza sosa na’an ka fa’an na’an ne’ebé iha poténsia nune’e bele hetan kompradór no sai fornesedór ne’ebé di’ak no sustentável. Faze ikus ba programa ne’e, organiza eventu ligasaun negósiu promosaun produtu no enkontru individuál ne’ebé depende ba sosa na’in no fa’an na’in nia preferénsia.

Programa ne’ebé organiza hosi IADE no Talho EBAI, hetan apoiu hosi projetu Business Opportunity and Support Services (BOSS) ne’ebé Organizasaun Internasionál ba Traballu (OIT), mak implementa ho apoiu finanseiru husi Irish Aid.