Governu Timor-Leste

FALINTIL–Forsa Defesa Timor-Leste (F–FDTL), Segunda loron 21, fulan Janeiru, tinan 2013, iha Kuartél Jenerál, Fatuhada, hala’o abertura ba datoluk ezersísiu Kobra ba Distritu Manufahi, Sub-Distritu Fatuberlihu, Suku Welaluhu. Objetivu hosi ezersísiu ne’e atu hatene oinsá hala’o operasaun tátika iha terrenu no mós hasa’e kapasidade forsa sira nian atu oinsá hametin relasaun diak ho populasaun.

Sekretária Estadu Defesa, Júlio Tomás Pinto, iha ninia diskursu abertura hateten katak, ezersísiu Kobra ne’e hanesan parte ida  atu hasa’e kapasidade no aumenta tán profesionalizmu membru  F–FDTL sira nian iha terenu. Tuir nia hateten, iha Ezersísiu Kobra ba Datoluk hahú iha tinan 2013 ne’e, hanesan parte ida hodi hatudu ba mundu no nasaun sira seluk katak, Timor-Leste mós prontu ona atu servi nia nasaun ho espíritu disiplina no tuir regulamentu militár nian.

“Ha’u husu ba imi hotu atu hatudu disiplina maka’as, nune’e  populasaun sira bele hatene katak ita mós iha disiplina hodi kaer metin regulamentu militár tuir estrutura hirarkia komandu nian”,  dehan Júlio Tomás Pinto.

Iha fatin hanesan, Brigadeiru Jenerál Filomeno Paixão iha ninia intervensaun hateten katak, ezersísiu ne’e la’ós foin halo, maibé uluk hala’o tiha ona ezersísiu hanesan ne’e iha parte Leste no parte Súl mak seidauk. Aleinde ne’e, membru F–FDTL foun barak mak seidauk hatene área iha parte súl nian, tán ne’e, halo planu foun ba Ezersísiu Kobra Datoluk.

“Ezersísiu Kobra ne’e, envolve komandu hotuhotu hahú hosi ekipa Estadu Maior, Komponente Terrestre (KT), Komponente Apoiu Servisu (KAS), Komponente Formasaun no Treinu (KT), Komponente Navál (KN) ho Polísia Militár (PM), ne’ebe lidera hosi Komandante Operasaun  Konjuntu Tenente Koronél Cesário Marçal Ximenes “Haksolok” ho Komandante Operasaun Tátika Maijór João da Costa Esteves, ne’ebé sei hala’o mós atividade mak hanesan, pasa revista, emboskada no halo atividade militár hirak seluktán”, dehan Filomeno Paixão.