Sorumutu kona-ba Jestaun Dezastre Naturál sira
Ministériu Solidariedade Sosiál (MSS), iha tersa-feira, loron 15 fulan Janeiru tinan 2013, iha Salaun Ministériu Solidariedade Sosiál, Kaikoli, Díli, organiza sorumutu interministeriál, ONG Nasionál no Internasionál, no mós sosiedade sivil tomak, ho objetivu atu halo preparasaun kona-ba jestaun atu previne dezastre naturál sira iha tempu udan.
Vise-Ministru Solidariedade Sosiál, Jacinto Rigoberto de Deus, hateten, “haree ba tempu udan ne’ebé kauza família barak sofre hosi konsekuénsia alterasaun klimátika, maka Ministériu Solidariedade Sosiál foti medida sira hodi konvoka sorumutu inter-ministeriál, ne’ebé partisipa hosi liña Ministeiál sira tomak, Sosiedade Sivil, no mós ONG sira hotu, hodi halo preparasaun atu hatene idaidak nia papél oinsá atu previne dezastre naturál sira”.
Iha fatin hanesan, Ministru Komérsiu, Indústria no Ambiente (MKIA), António da Conceição, hateten, “dezastre naturál sira ne’e responsabilidade konjuntu, hosi parte MKIA, ne’ebé toma konta mós ba ambiente. Tanba ne’e mak ami mós partisipa atu bele kontribui nafatin ba ezijénsia hirak hosi dezastre naturál sira, tenke halo intervensaun umanitária. Ministériu Komérsiu Indústria no Ambiente la bele hala’o mesamesak maibé koopera ho MSS ne’ebé mak durante ne’e ajuda fós, hodi fó apoiu ba malu nafatin. Tanba ne’e, mak ami tenke buka métodu ida diak atu bele fó apoiu ba Ministériu Solidariedade Sosiál ba assisténsia umanitária ida ne’ebé adekuada”.
“Nune’e mós tenke halo prevensaun no apoiu atu komunidade sira mós bele halo planu atu adapta ba situasaun, tanba bainhira dezastre mósu komunidade hatene ona, iha hanoin hodi evakua lalais no mós bele halo rezerva ba hahan bainhira hasoru situasaun hanesan ne’e”, katak Ministru.
Iha sorin seluk, Administradór distritu Viqueque, Francisco da Silva hateten, enkontru ne’e importante tebes. Durante ne’e liña koordenasaun entre Ministériu Solidariedade Sosiál ho autoridade lokál sira la’o di’ak liuhosi pontu vokál iha distritu no sub-distritu sira no nafatin halo koordenasaun ba malu bainhira iha dezastre ruma. Administradór ne’e realsa liu tán katak, tenke prepara fasilidade liu-liu prepara orsamentu ba iha distritu sira, atu iha tempu emerjénsia ruma ita bele atende lalais vítima dezastre naturál sira.
