Sorumutu daneen Dirijente Administrasaun Públika
Komisaun Funsaun Púlika (KFP), iha loron 17-18 fulan Janeiru, tinan 2013 organiza sorumutu nasionál direjente administrasaun públika nian ho Primeiru-Ministru, Kay Rala Xanana Gusmão ho tema “Dezempeñu, Dedikasaun no Integridade” iha Sentru Konvensaun Díli.
Prezidente Repúblika, Taur Matan Ruak, iha ninia diskursu, bainhira loke sorumutu ne’e, hateten katak, administrasaun públika ne’ebé mak iha kualidade, tenke konsentra atensaun ba prestasaun servisu ba povu, tanba povu nu’udar estadu nia kliente, ho nune’e tenke servi sira ho didi’ak.
Xefe Estadu mós propoin ba Administrasaun Públika Estadu ninian atu defini metas, dezempeñu ba funsionáriu sira, tenke halo avaliasaun permanente ba sira nia dezempeñu, atu nune’e bele ajuda sira hodi ezerse sira nia funsaun ho didi’ak, nune’e bele kontrola iha baze ba espiritu justisa, hodi kria kondisaun ba povu nia konfiansa, atu sira mós bele servisu hamutuk ho ita, hanesan servisu ekipa hodi kombate no minimiza probreza iha ita-nia rain, esplika Taur Matan Ruak.
Iha fatin hanesan, Primeiru-Ministru, Kay Rala Xanana Gusmão iha ninia intervensaun, husu ba funsionáriu sira tomak no direitór jerál sira hotu atu hasoru malu beibeik hodi hadi’a uma laran no hamóris konfiansa foun, nune’e bele fó konfiansa ba estadu no povu ida ne’e, tanba ita hotu presiza sai ezemplu di’ak, hodi bele sai eroi foun ba Nasaun no povu ida ne’e.”
“Ita hotu ohin halibur malu iha fatin ida ne’e, atu ko’alia kona-ba saida mak ita halo ona no saida mak ita hakarak atu halo, tanba ne’e eziji ita hotu ninia kontribuisaun hodi tane aas Estadu ida ne’e, hodi servi povu no rai ida ne’e ho dezempeñu, dedikasaun no integridade” hateten Xanana.
Sorumutu daneen ne’e partisipa hosi Prezidente Repúblika, Taur Matan Ruak, Primeiru-Ministru, Kay Rala Xanana Gusmão, Prezidente Komisaun Funsaun Públika, Libório Pereira, membru Governu, Prezidente Komisaun ba Eleisaun (KNE), Komisáriu Komisaun Anti Korrupsaun (KAK), Provedór Direitus Umanus no Justisa (PDUJ), korpu diplomátiku sira, Inspetór Jerál Estadu, Inspetór Jerál sira hosi Ministériu hotu, Diretór Jerál, Diretór Nasionál, Administradór Distritus, Administradór Sub-Distritu sira no Xefe Departementu hosi Ministériu no Sekretária Estadu sira hotu.
