Governu Timor-Leste

UNMIT, liuhosi GNR (Guarda Nasionál Repúblikana)Portugál entrega bens no moveis UNMIT nian hanesan kareta, mobiliáriu no Kuartél ba Governu Timor-Leste, ne’ebé hala’o iha Kuartél GNR nian iha Caicoli, Dili, iha Segunda-Feira, loron 10 fulan Dezembru tinan 2012.

Iha serimónia entrega ida ne’e, Sekretáriu Estadu Seguransa iha ninia diskursu hateten katak “Fatin ida ne’e aban-bainrua PNTL sei uza ba iha formasaun ba ofisiál PNTL nian, tanba iha tinan oin sei iha rekrutamentu ba ajente ofisiál sira, sei halo formasaun ba iha sira ne’ebé atu bá tuir kursu  formasaun  PNTL nian. Fatin ne’e sai hanesan fatin ba kursu kooperasaun bilaterál  entre Portugal no Timor Leste”.

Sekretáriu Estadu ne’e mós akresenta liután katak iha área formasaun ne’ebé maka durante ne’e halo ona entre Portugál no Timor-Leste mak iha elementu GNR sira ne’ebé durante ne’e fó hela apoiu ba iha rekrutamentu formasaun báziku no formasaun  espesilizada sira.

Iha fatin hanesan, Kapitaun  Pedro Raposa hateten katak agora sira sei entrega kuartél ne’e ho kondisaun di’ak ba governu Timor-Leste atu tuirmai Governu Timor-Leste organiza sé maka sei uza fatin ida ne’e.

Partisipa iha serimónia ne’e maka Sekretáriu Estadu Seguransa, Francisco Guterres, Diretór Jerál Servisu Kooperativu Ministériu Finansas, Januário da Gama, Diretora Nasionál Património Estadu, Evangelina Aparicio Guterres, Komandante Kontijente GNR-Portugál, Kapitaun Pedro Raposa, Diretór Lójistika Nasionál PNTL, Basilio de Jesus, Delegasaun Misaun UNMIT, Muzira Giri Tapa no Diretór Nasionál Terras no Propriedade, Romeo Guterres.