Vise-Primeiru-Ministru Lansa Livru kona-ba Dom Boaventura
Vise-Primeiru-Ministru Koordenador ba Asuntu Sosial, Fernando La Sama de Araújo, iha tersa-feira, loron 27 fulan Novembru 2012, hafoin selebra tiha misa hodi komemora Loron Proklamasaun Independénsia Timor-Leste nian ba da-37 no Sentenáriu Revolta Dom Boaventura, halo lansamentu ba livru ho ninia títulu, Dom Boaventura, iha salaun paróquia Nossa Senhora Assunção, iha Same, distritu Manufahi.
Vise-Primeiru-Ministru, iha nia diskursu hateten katak, “Lia fuan hirak hakerek iha livru ne’e, hanesan lilin ida ne’ebé mak sei leno dalan ba iha futuru hodi hamosu tan peskiza barabarak atu hakle’an liután informasaun, kona-ba Timor nia istória, liliu istória kona-ba Revolta iha Manufahi”.
“Tanba ne’e, livru ida ne’e bele uza iha eskola sira iha Timor-Leste nia laran tomak, atu nune’e ita-nia jerasaun foun sira bele hatene kona-ba istória ita nian”, tenik La Sama.
Iha fatin hanesan, Benjamin Cardoso, autór ne’ebé hakerek livru ne’e, hateten, “Livru ne’ebé ha’u hakerek hanesan kontribuisaun ida ne’ebé ha’u oferese ba nasaun. Iha tempu rezisténsia Timor-oan sira ne’ebé mak hela iha rai li’ur, fó sira-nia kontribuisaun ba luta ukun rasik-an ne’e duni ami iha nafatin devér atu fó kontribuisaun ba Timor-Leste nia dezenvolvimentu, liu hosi esperiénsia no saída mak ami bele halo”.
